Parlamentario Edgard Vrolijk, fraccion MEP:
ORANJESTAD (AAN)-- Den conferencia di prensa di fraccion di Partido Movimento Electoral di Pueblo (MEP), e siman aki, Parlamentario Edgard Vrolijk a hiba palabra, den cual el a trece dilanti algun cuestionamento.
Na prome lugar, cu Aruba ta na 40 aña di Status Aparte, pero practicamente nada ta wordo sinti di e celebracion aki for di gobierno y siguramente ni respeta nos Instituto cu ta Parlamento mes!
Asina Parlamentario Vrolijk a remarca. “Mi ta hopi desapunta. Full siman y fin di siman mi ta riba esaki, y bo ta bisa cu a crea fundeshinan firme pa e pais aki, y bo ta wak cu esaki, lamentablemente, ta wordo destrui door di e identidad cu yama Parlamento di Aruba, cu mester laga respeta nos Constitucion”, Parlamentario Vrolijk a señala.
El a referi na e reunion cu Parlamento a palabra cu Minister Wendrick Cicilia, cu lo mester a tuma lugar e dia ey mainta, y por a wak cu atardi a drenta un email cu e reunion aki a wordo cancela pero no a duna ningun motibo valido.
“Nos ta custumbra cu ora un Minister no ta bin, por pasa, pero ta manda un carta oficial y ta bisa e motibonan pakico e no ta bin, y naturalmente presidente di Parlamento tin cu pone e fecha siguiente cu esaki por continua. Pero lamentablemente Parlamento a crea un modus operandi hopi deplorable, unda cu nos ta wak cu tin un wega hopi lamentable cual ta cuminza pa tarda demasiado pa yama reunion, of ta keda sin yama reunion. Y banda di esaki ora cu yama reunion, den wega di yama reunion ta suspende esaki y nunca mas yam’e. Y otro wega nos a combibi, ora cu netamente e reunion mester a cuminza, ta cancela esaki y bisa ‘te proximo aviso’. Kiermen, ta lamentabel, un instancia cu mester trece claridad y transparencia pa pueblo, t’esun cu ta sconde”, Parlamentario Vrolijk a remarca.
E Parlamentario a comenta cu su fraccion pa basta tempo a traha un reglamento di orden cu ta cla drumi eyden, pero ningun hende kier a implement’e.
“Pasobra netamente si implement’e e tipo di accionnan aki ta caba, pasobra e Presidente ta keda ‘accountable’ pa locual cu e ta haciendo. Kiermen e tin cu duna cuenta pakico no ta yama reunion, of ta suspende, cu ta motibo cu nan por kita bo como presidente di Parlamento, inmediatamente. E ta di lamenta cu nos, envez di progresa den 40 aña, nos ta bayendo atras como instituto”, Parlamentario Edgard Vrolijk a señala.
