Parlamentario Marco Berlis (MEP):
E ideologia destructivo cu ta invadiendo nos comunidad atraves di un agenda scondi
ORANJESTAD (AAN): Segun Parlamentario Marco Berlis (MEP), ideologia di genero ta un ideologia cu ta expandiendo su agenda globalmente y a haya acceptacion di gobiernonan di algun pais, sinembargo a wordo rechasa pa e gran mayoria. E ideologia aki cu ta buscando manera pa “normalisa” e redefinicion di e famia tradicional, matrimonio tradicional, ken y kico un homber y un hende muhe ta, con un persona ta liber pa identifica su orientacion sexual den un di nan decenas di generonan cataloga y mucho mas.
Lamentablemente e plataformanan social ta promove e ideologia aki fuertemente, pero ta educa poco riba e efectonan negativo y peligroso cu e ideologia aki a bin ta promove y e odio cu e ta creando contra di por ehempel fe religioso, Dios, matrimonio tradicional di miles di aña, custumbernan, tradicion, principionan y balornan familiar.
Reaccion iracional di activistanan di ideologia di genero contra esnan cu ta criticanan
Activistanan di ideologia di genero global ta ocupando nan mes pa exigi y impone nan agenda riba sociedadnan rond mundo. Ora cu critica masal ta bin for di mayor y ciudadanonan contra e ideologia di genero, e activistanan mesora ta purba gana simpatia door di acusa cu nan criticanan tin homofobia, transfobia, ta discrimina, ta sembra odio y cu nan ta victima di abuso. E lenguahe aki nan ta usa pa intimida y trata na stempel esnan critico di nan ideologia, pa asina silencia nan.
E realidad ta cu activistanan di e ideologia di genero ta dedica nan mes pa ataca tur esnan cu no ta di acuerdo cu nan y cu ta contradeci nan ideologia. Ideologia di genero ta expresa su mes fuertemente contra religion Cristian, famia tradicional, matrimonio orginal, contra Dios, nan ta haci mofa publico di Bijbel, ta ridiculisa clero religioso basta nan por defende nan ideologia. Den nan “pride parades” na diferente pais por “google” con nan ta usa e figura di Cristo ne Cruz, y ta exhibi un Cristo homosexual cu ta interactuando cu otro homosexualnan.
Si ta aceptacion nan ta buscando, anto pakico ataca balornan, principionan, tradicion y religion sagrado di e mayoria di e poblacion? Esaki no ta un actitud racional, sino uno cu ta mas bien incomprendibel. Nos ta biba den un democracia na unda tur hende por expresa su mes libremente. E pensamento cu ciudadanonan mester acepta nan redefinicion di sociedad, lenguahe, maneho di gobernacion, di nos scolnan, expone nos yiunan chikito na indoctrinacion sexual for di chikito, sin cu esaki lo lanta protesta algun, hamas lo sosode.
Kendenan ta e enfoke y meta di ideologia di genero?
E enfoke di e ideologia aki ta nos yiunan, nos muchanan chikito. E ideologia aki kier impone su mes den scolnan di nos muchanan, redefini biologia en relacion cu e genero di babynan, presenta hombernan disfrasa como “gender queen” pa duna lesnan di ideologia di genero, cu ta lesnan di homosexualidad na muchanan chikito.
Riba plataformanan social por wak un desaroyo alarmante di e mover aki con ‘gender queens’, maestronan ta duna les di ideologia di genero. Bukinan, lesnan, cursonan pa muchanan for di 1 aña ta existi y ta keda duna caba na scolnan den exterior.
Na Hulanda nos por a wak con ganador di eleccion PVV y su lider Geert Wilders a expresa fuertemente contra e ideologia di genero cu a keda imponi den e scolnan. Ademas, Tierry Baudet di FVD a traha videonan tambe en relacion cu e peliger aki pa muchanan hopi chikito cu ta wordo indoctrina cu e ideologia di genero siendo nan no ta prepara mentalmente pa esaki. Ta bon pa pueblo sa cu e activistanan di e ideologia atraves di video, protesta y canticanan online a declara publicamente cu nan lo bin pa nos yiunan. Esaki no ta un secreto. Atraves di indoctrinacion di nos yiunan nan ta spera di “normalisa” e ideologia peligroso aki den nos sociedad, y lanta un generacion cu ta desecha tur loke awendia mas di 80% di nos poblacion ta para y kere den dje. Sigui e link aki y wak pa bo mes e declaracion di activistanan di ideologia di genero con nan ta canta cu nan lo bin pa nos muchanan. Pronto mi lo sigui duna mas informacion.
