Parlamentario Evelyn Wever-Croes:
- Astrid Vries no ta prensa y no mag di ta den area designa pa prensa den Parlamento
ORANJESTAD (AAN): Dialuna mainta, den conferencia di prensa di Fraccion di MEP, Parlamentario Evelyn Wever-Croes a informa cu e fraccion a entrega un otro keho pa un situacion cu a pasa den e reunion di diabierna ultimo den Parlamento. Ta trata aki di un persona cu no ta reconoci como prensa oficial, tabata saca potret den e luga destina pa prensa.
Den Parlamento, tin un dos area designa pa prensa reconoci oficialmente como prensa. Den e reunion di siman pasa, tawatin un persona femenino cu no ta miembro di prensa reconoci oficialmente tabata para den un di a areanan designa pa prensa ta saca potret y constantemente tabata filma Parlamentarionan di Fraccion di MEP.
“Esaki, ta prohibi den Parlamento. Solamente prensa reconoci mag di drenta eyden,” Parlamentario Wever-Croes a enfatisa.
E persona aki, cu tabata filmando, ta un candidato riba lista di AVP, y liga na e pagina fake di Facebook ‘Politica ta Cruel’. E pagina aki, ta conoci cu constantemente ta bully, harras, ofende tanto Partido MEP, Fraccion di MEP y hasta esnan cu ta MEP. Parlamentario Wever-Croes a indica cu Partido MEP ta preparando pa entrega keho contra e pagina aki, y pronto lo tin informacion concreto kende ta tras di e pagina aki.
Mientras cu e persona femenino aki tabata filma den e luga destina pa prensa, Parlamentario Wever-Croes a pone na atencion di e presidente di Parlamento cu e persona no mag di ta eyden segun reglamento di Parlamento y a indica cu e mester pone ordo segun obligacion di su tarea.
Wever-Croes a indica cu e presidente di Parlamento a contesta cu e persona femenino en cuestion, Astrid Vries ta miembro di Hit 94. Cual, segun e parlamentario, no ta berdad. Pero un biaha mas presidente no a haci caso y a laga e persona sigui graba. Y mientras e ta sinta eynan, e tabata post loke el a graba riba e pagina fake di Facebook ‘Politica ta Cruel’.
“Nos a acerca e radio en cuestion kende a desminti cu e persona aki ta traha pa nan y awe un keho a ser entrega na Presidente di Parlamento riba e hecho aki,” Wever-Croes a expresa.
Segun e Parlamentario, e lo kier sa con e presidente di Parlamento a saca conclusion cu e persona aki ta traha pa e emisora menciona y a indica cu aki ta trata mas bien di un kiebro di confianza, di integridad, y di siguridad hopi serio, pasobra no ta cualkier hende por ta den e luganan asigna pa pensa durante reunionnan den Parlamento mientras cu presidente di Parlamento ta haci wega cu esaki.
“Nos tin un presidente di Parlamento cu ta mas enfoca riba kico hende ta wak, riba ‘window dressing’, pero ta trapando riba e fundamento di nos constitucion. Nos a manda mas di 10 keho contra e presidente aki, y e no ta cambia su actitud. Despues di reces, nos ta spera cu e kehonan aki por logra cu por lo menos e presidente di Parlamento reflexiona y cambia su actitud y no kibra imagen di Parlamento,” Parlamentario Wever-Croes a subraya.
