ORANJESTAD (AAN): Jennifer Arends- Reyes ta riba e lista prestigioso di AVP como cadidata #6. Jennifer desde 2013 a cuminsa como candidata #20 riba e lista di AVP como candidata determina cu firmesa.
E confiansa deposita den su persona cu mas di 600 voto a dune e oportunidad pa drenta parlamento pa 4 aña largo y despues na number #10 pa 4 aña mas, Jennifer semper a sa di traha hibando un politica di nivel y cu respet. E periodo di 2013- 2017, Jennifer tabata Presidente di e comision di turismo den parlamento y e periodo di 2017-2021 como miembro di diferente comision manera Enseñansa, Social, Salubridad, Finansas y Economia y Infrastructura. Y tambe internacionalmente a representa Aruba den diferente conferencia na Hulanda den IPKO, Eerste kamer y Tweede Kamer y como orador invita na Latino America.
Un docente di profesion den e materia Ingles, semper cu amor y dedicacion pa su studiantenan y coleganan a pone cu Enseñansa ta serca di su curason y ta forma parti di su plan di accion pa cu eleccion 2024. Turismo ta un area cu Jennifer tambe ta concentra su mes aden mirando cu actualmente e ta Aruba su unico pilar economico. Como Presidente y miembro di e comision di turismo den parlamento, a pone cu Jennifer a sigui e desaroyo aki di serca. Ainda nos por corda e exitoso campaña cu Jennifer a hiba ultimo eleccion; ‘Turismo Ta Nos’. Jennifer ta kere firmemente cu cada trahador den e sector di turismo, merece un oportunidad igual y digno pa labora den e sector aki. Un sector cu ta exigi hopi, dianan largo pero ta kere tambe cu merece mihor compensacion y oportunidad pa crece.
Nos hobennan studiante cu lo bai eherce nan derecho di voto pa prome biaha, por conta cu e sosten y apoyo di Jennifer den e area di enseñansa pa asina por brinda un educacion di calidad. Nos scolnan falta mas atencion pa mantencion grandi y materiaal moderno. Nos maestronan merece mas ayudo pa asina por sigui brinda y guia na nos hobennan.
Jennifer ta casa y ta mama di un yiu muher, cual su lucha ta pa tur mucha por crece den un Aruba prospero y cu oportunidad pa un y tur. Un Aruba cu un turismo di calidad cu menos impacto riba nos medio ambiente. Un Aruba cu enseñansa di nivel pa nos muchanan por tin un futuro briyante. Un voto pa Jennifer ta un voto cu determinacion firme.
