Jennifer Arends-Reyes ta pidi siguimento y un plan financiero duradero pa HOH

Jennifer Arends-Reyes ta pidi siguimento y un plan financiero duradero pa HOH

ORANJESTAD (AAN): Parlamentario Jennifer Arends-Reyes ta pidi gobierno y AZV pa duna parlamento y

pueblo claridad tocante e situacion financiero di Hospital Dr. Horacio E. Oduber (HOH). E kier sa ki ora e analisis financiero independiente lo ta cla, con su resultadonan lo guia e decisionnan y ki acuerdonan lo sigura e financiamento di hospital te cu fin di 2026 y durante 2027.

Gobierno a informa cu e ta den dialogo cu HOH y AZV pa algun luna caba y cu e partinan a acorda un analisis independiente pa evalua e necesidadnan financiero di hospital. Arends-Reyes ta reconoce e pasonan cu a tuma y ta pidi pa Parlamento ricibi actualisacion regular riba e progreso di e analisis y di e decisionnan cu mester sigui.

Claridad riba adelantonan y financiamento

Segun AZV, e ta brinda adelantonan financiero na HOH desde februari. Na cuminsamento di november, AZV a anuncia un adelanto adicional di Afl. 15 miyon, cu a trece e total di adelantonan extra pa 2026 na Afl. 31 miyon.

“E adelantonan ta duna hospital un poco mas di espacio financiero, pero e solucion duradero ainda ta den discusion. Nos mester sa ki ora e analisis lo ta cla y con e resultado lo yuda guia e siguiente decisionnan,” Arends-Reyes a bisa.

E parlamentario ta pidi tambe pa aclaria si tin un decision pa desconta e adelantonan for di e pagonan regular di december. E kier sa con e decisionnan financiero por afecta pagonan na proveedornan, disponibilidad di material medico, personal y tratamentonan programa.

Preocupacion di personal y continuidad di cuido

Arends-Reyes a referi na e pausa di dos ora cu personal di HOH a tuma riba 11 di november pa expresa nan preocupacion tocante e incertidumbre financiero. E sindicato a expresa preocupacion riba e posibel impacto pa personal y pa cuido, mientras directiva di hospital a indica cu e preocupacionnan ta comprendibel. Segun e parlamentario, gobierno, AZV y HOH mester evalua e señalnan aki hunto y informa parlamento di e medidanan cu ta necesario pa garantisa continuidad di cuido.

E peticion ta bin den e siman cu Aruba ta anfitrion di e Vierlandenoverleg di Salud, cu ta tuma luga di 16 te cu 20 di november. E reunion ministerial di e cuater paisnan ta programa pa 19 di november.

“Nos ta reconoce e compromiso cu gobierno y AZV a expresa. Awor ta importante pa e compromiso bira un plan concreto, cu meta, fecha y responsabilidad defini, y pa parlamento por ricibi un actualisacion. Nos meta comun mester ta proteha pashent, apoya e personal di salud y sigura un futuro financiero sostenibel pa HOH,” Arends- Reyes a conclui.