Marco Berlis di MEP
ORANJESTAD (AAN): Pueblo no por tuma “a la ligera” e chaos cu ta existi alrededor di e nombramento di Mike de Meza como e posibel minister nobo di Energia y Infrastructura. Ta pa prome biaha den historia di Aruba nos ta wak un caso asina bergonzoso, na unda a lek practicamente tur informacion di su screening como candidato pa minister, y pueblo por a scucha y lesa pa su mes con e conseho di comportacion fiscal di sr. de Meza a resulta negativo y bergonzoso.
Cartera di Integridad a keda dera bao Gabinete AVP/Futuro! No tabata nada straño cu e cartera di integridad a desaparece bao mando di e gabinete nobo di AVP/Futuro. Historia recien ta mustra nos tambe pakico e no tin sentido pa e dos partidonan aki pone integridad riba pedestal; “ambos partido a celebra y brasa corupcion abiertamente enbes di condena esaki.” AVP y Futuro a priminti pueblo un politica nobo y moderno, pero ora di forma gobierno y a reparti cartera, inmediatamente a pone como prioridad pa “dera” integridad!
Kiebro di integridad, seriedad y “voorbeeld functie” di parti Mike de Meza. AVP ta sigui trata na hustifica di tur manera e nombramento di sr.Mike de Meza como minister. Medionan amigo y e makinaria di Mike Eman ta manipulando informacion riba nan plataformanan. AVP kier logra nan “kier”, sin tene cuenta cu pueblo y sin trata na haci loke ta mas dificil; haci lo corecto! Pues, esaki ta e realidad di Mike de Meza 73 dia despues di formacion;
(1) Mike de Meza no por a bira minister pasobra conseho di DIMP a sali negativo. Mike Eman y Gerlien a manda Mike pa drecha su cuenta cu DIMP y yega na areglonan pa su fayonan intencional di no paga belasting y no yena papelnan di belasting pa varios aña.
(2) Aunke de Meza su pagonan di belasting a “verjaar/caduca” y DIMP no por cobr’e mas, DIMP ta haya cu de Meza tin e responsabilidad moral pa paga e debe aki. Moralidad den AVP? No sir!
(3) Mike de Meza NO ta paga belasting, pero si ta un persona humilde di nos comunidad e ora SI ciudadano mester paga y sufri e consecuencianan. Esaki no por!
(4) E situacion y forma inacceptabel con parlamentario de Meza ta trata cu su pagonan y responsabilidad di belasting, lo sigui causa cu pueblo ta perde confiansa den politica y gobierno formalmente.
(5) E simpel hecho cu Mike de Meza a bay corte pa bringa su caso pa DIMP cambia su decision, ta demostra cu e mes a conclui cu no ta etico pa bira minister cu un conseho negativo. Un minister su record mester ta impecabel, aunke nos sa cu AVP no ta preocupa cu esey.
(6) Mike de Meza a perde su caso den corte: “Hues no por a dicta un sentencia y pesey de Meza no a haya” loke e la pidi p’e.” Henter e situacion a keda mescos, kiermeen DIMP a gana.
Integridad ta un Fundeshi di Bon Gobernacion: Integridad den gobernacion ta significa cu esnan cu ta goberna nos pais mester actua cu honestidad, transparencia y responsabilidad. Ora un candidato minister tin problema cu su propio comportacion fiscal, esaki ta crea un pregunta serio tocante con e lo por goberna efectivamente. Si integridad tabata un prioridad, manera AVP/Futuro a priminti den campaña electoral cu nan “politica nobo”, e nombracion aki lo mester a wordo rechasa. Sin embargo, locual nos ta mira ta cu e cartera di integridad a “desaparece” completamente for di e gabinete nobo.
Esaki ta un dia hopi scur pa Aruba. Pueblo ta premira cu Mike Eman lo posiciona Mike de Meza como minister di e mesun manera cu e la defende, hustifica, y celebra e sentencia di Benny. “Integridad a keda dera” bao di gobierno di FUTURO y AVP
