Parlamentario Eduard Pieters:
ORANJESTAD (AAN): Eduard Pieters a expresa su decepcion den madurez politico di su coleganan di parlamento, cu ta parce di ta come y lubida riba mocion cu PPA a presenta y nan a vota contra. Recientemente parlamentario Carlos Bermudez a elogia e mocion presenta den Parlamento Hulandes tocante e situacion di e studiantenan di e paisnan CAS y BES. Eduard Pieters a señala, cu segun Bermudez, e mocion di parlamentario Raoul White (GroenLinks/PvdA) ta un iniciativa hopi bon, pasobra e ta busca pa e studiantenan haya un dispensacion (kwijtschelding) di debe como studiante, si nan ta bin bek traha pa nan pais den un periodo determina.
Ironia y hipocrecia ta, cu e colega aki a papia riba tema di “Brain Gain”, destacando su deseo y aprobacion di e mocion di parlamentario Hulandes White, pa trece e studiantenan Arubano bek pa tera, ofreciendo nan oportunidad di trabou y bibienda.
PPA tabata un paso dilanti
Sinembargo, esaki ta exactamente e direccion cu PPA ya tabata propone. Parlamentario Eduard Pieters a recorda cu dia 28 di maart, fraccion di PPA a presenta un mocion propio den Parlamento di Aruba, cu tabata liga na e presuesto nacional. “E mocion aki tabata urgi gobierno pa hiba combersacion cu DUO na Hulanda, cu e meta pa haya reduccion di interes pa e studiantenan cu a termina nan estudio exitosamente y pa crea un periodo di gracia di 5 aña prome cu nan cuminsa paga nan debe bek,” Eduard a expresa.
E mocion di PPA no tabata pidi kwijtschelding total, pero tabata un solucion realistico, sostenibel y directamente beneficioso pa nos studiantenan y su famia. Segun Pieters, “Esaki tabata un mocion hopi mas agradabel y constructivo, den beneficio directo pa nos hobennan profesional.”
Inmadurez politico y hipocrecia den Parlamento
E realidad lamentabel aki, segun PPA ta, cu e mesun parlamentarionan aki cu a vota contra e mocion di PPA, awor ta sali elogia un mocion Hulandes cu tin casi e mesun contenido y meta. Esaki sigur ta un refleho di un acto di hipocrecia y inmadurez politico, combina cu falta di vision pa traha pa bienestar general di nos pais.
“Nan ta papia di hiba un politica moderno y responsabel, pero ora bo ta nenga pa vota pro un mocion cu ta claramente na bienestar di nos pueblo, den e caso aki pa nos studiantenan, bo ta mustra cu bo interes di partido tin mas peso cu e bienestar general di nos hendenan,” Pieters a agrega. Di otro banda fraccion di PPA si ta mantene su postura cla: ora un mocion ta positivo y na bienestar di pueblo, nan ta vota pro, sin importa ken of cua partido ta presenta e mocion. “Esaki ta loke ta separa un lider cu vision pa su pueblo, cu un politico cu ta sigui direccion di su partido,” Pieters a enfatisa.
Falta di plan y vision den AVP
Pieters a expresa cu e actitud di Bermudez ta refleha un problema hopi mas profundo y alarmante: e falta di plan y vision den su partido AVP. “Si bo ta den un partido cu ta bay eleccion sin un programa di campaña, sin un plan pa Aruba, e resultadonan ta obvio: falta di conocemento, ambicion y direccion,” el a bisa.
El a agrega cu e formacion di gobierno aki tabata esun di mas largo den historia y esaki tin di haber cu partido AVP no tabatin un plan di gobernacion concreto.
Si no tabatin un periodo stipula pa forma gobierno, ainda nos lo ta den e proceso ey. “Esaki ta mustra cu partido AVP no tabatin ni su metanan, ni strategia, ni un ruta cla pa pais Aruba.”
Apelacion final pa responsabilidad politico
Pieters ta haci un apelacion pa su coleganan tin mas madurez y consistencia politico den Parlamento: “E bienestar di nos hobennan y futuro di nos nacion no por ta depende di un wega di partido. Si bo ta kere den nos hobennan y progreso, e ora bo mester vota pro pa mocion cu ta sostenibel y husto. Aruba tin mester di lidernan cu ta pone pais prome cu partido.”
