Parlamentario Hendrik Tevreden:
- Ta exigi claridad na e Minister encarga tocante e futuro di e departamento
ORANJESTAD (AAN): Departamento di Progreso Laboral, DPL, tin un tarea cu ta fundamental pa Aruba: yuda hende local haya trabao, conecta dunadornan di trabao cu buscadonan di trabao y contribui na proteccion di nos mercado laboral. Pero señalnan cu ta yega for di e propio departamento ta lanta preguntanan serio tocante con DPL ta funcionando actualmente.
Preocupacion: Segun Parlamemtario Tevreden di MEP, señalnan preocupante for di e propio departamento ta saliendo. Un trahado di DPL a acerca nan cu un relato preocupante. Segun e empleado, tin personal cu ta presenta na trabao pero cu pa mas cu un aña y mey practicamente no tin trabao pa haci. E empleado ta describi con ocho ora den oficina sin un tarea claro ta cuminsa afecta nan mentalmente. “Nos ta yega cas mas cansa door di no haci nada,” e empleado a bisa.
Segun e relato aki, tin coleganan cu 20, 25, 30 y hasta 35 aña di servicio cu nunca anteriormente a experiencia un situacion similar. E empleado a cuestiona e falta di un maneho cla y a expresa su preocupacion tocante e rol cu DPL ta hunga actualmente den proteccion di e mercado laboral local.
Parlamentario Tevreden a enfatisa cu, maske e declaracionnan aki mester wordo verifica, nan ta suficientemente serio pa no wordo ignora. Pa e motibo aki, e parlamentario a dirigi preguntanan oficial na e Minister encarga pa e por actua cu e urgencia cu e caso aki ta rekeri.
Realidad: Ta papia di un contraste entre discurso oficial y realidad interno! Mientras e departamento ta enfrenta e inaccion interno aki, Gobierno ta presenta iniciativa publico cu ta duna otro impresion:
Den juni, Gobierno a aproba un contract di US$ 65.000 pa un ICT-assessment y un Quick Scan pa DIMAS y DPL cu e meta pa determina e inversionnan necesario pa futuro.
Desde juli, parti di Directie Arbeid en Onderzoek (DAO) a munda temporalmente pa e edificio di DPL na Engelandstraat bou di e nomber di “continuidad” y "modernisacion".
Recientemente DPL a aparece atrobe como partner den e tercer edicion di e programa “In The Picture” pa integracion laboral. Caminda Gobierno a destaca cu den e edicion anterior 19 persona a logra drenta mercado laboral hunto cu ayudo di DPL.
E parlamentario ta señala cu e contraste aki ta sumamente incomodo: mientras ta pidi e ciudadano pa activa su mes, prepara su mes y busca trabao, internamente e empleadonan publico di DPL mes ta keda pa mas cu un aña y mey sin direccion ni un plan di trabao cla di parti di e Minister encarga.
Preguntanan clave na e Minister encarga: Parlamentario Tevreden ta aclaria cu e meta di su accion no ta pa señala e trahadornan, sino pa exigi cu nan wordo scucha y yuda mas pronto posibel. Pa e motibo aki, e parlamentario a presenta e siguiente preguntanan oficial na e Minister:
(*) Maneho: Kico ta e maneho actual y e vision pa DPL?’
(*) Reestructuracion: Kico a cambia den e funcion di DPL despues di e cambionan relaciona cu DIMAS?
(*) Resultadonan: Kico ta e resultadonan concreto di e Quick Scan?
(*) Proteccion Laboral: Ken ta garantisa actualmente cu e mercado laboral local ta haya e proteccion cu ley ta exigi?
“Un departamento caminda personal capacita ta presenta diariamente sin haya trabao significativo pa haci, ta un señal cla di un falta di liderazgo y organizacion,” Parlamentario Tevreden a expresa. E parlamentario ta haci un yamada na Gobierno pa scucha e trahadornan, presenta un plan di accion cla y debolbe DPL su capacidad pa cumpli cu su meta principal: yuda e pueblo haya trabao y proteha e oportunidadnan pa nos hende local.
