Otmar Oduber despues di reunion di PPA cu SNBA:
- Tambe desaroyo di terenonan di refineria
ORANJESTAD (AAN): Miembronan di partido PPA a reuni cu San Nicolas Business Association y nan tabatin diferente pregunta y sugerencia. Otmar Oduber a cataloga e reunion aki como uno bastante fuerte, no facil, pero di nivel y pa cual e gradici e miembronan.
Un tema cu a worde atendi durante e reunion ta e hotel pariba cu dentro di algun luna ta bay habri su portanan, pero cu lamentablemente no ta mira ningun preparacion of planficacion pa e ripple effect cu ta bay tin.
Preparacion di por ehempel pa San Nicolas ta conciente cu ya caba tin oportunidadnan grandi pa loke ta trata e webo di oro cu tabata worde busca aki cu ta e hotel pa loke ta trata car rentals, tour operators, ampliacion/mehoracion di restaurantnan cu ya caba pa hopi aña ta lucha akinan. Otro ehempel ta prepara pa tin un infrastructura, sigui borda riba e intencion cu tabatin den e rapport cu a worde traha door di AIB caminda cu awe ta mira turistanan ta cana tur dia den promenade pa motibo di e plannan cu tabatin e tempo aya, cu a cuminsa cu Aruba Mural Project y despues a converti den e Aruba Art Fair cu a worde tuma den ultimo añanan pa Sr. Tito Bolivar y pa cual Otmar tin elogio.
Durante e reunion cu SNBA a papia tambe riba e empuhe cu como partido, den nan plan di campaña y di gobernacion, cu ta basa practicamente riba tres rapport cu a worde traha pa AIB y Price Waterhouse Coopers caminda cu mester bay sigui desaroya San Nicolas pa bira e siguiente capital turistico di Aruba.
“Esey mester ta e enfoke di nos tur. Dirigi nos mes, enfoca nos mes riba loke ya a worde crea. No tabatin nada, awo tin un base bon fuerte pa por construi riba djele, pusha den direccion aki y percura pa no solamente awo porfin, despues di mas di 40 aña, ta bay cuminsa gosa di e pilar economico di nos pais, pero tambe, haci di San Nicolas un destinacion unico, e ciudad di cultura y herencia di nos pais”, Otmar Oduber a expresa.
Agregando na esaki el a bisa cu e museonan cu a worde estableci na San Nicolas y cu lamentablemente ultimo añanan no ta hayando e atencion necesario, mester worde poni na nan nivel back, Cosecha cu tabatin pariba, e planificacion di proyectonan di mehoracion di edificionan cataloga como monumentonan. Uncle Louis Store cu awe tin oficina di gobierno den dje, Nicolas Store, Watertoren cu awe tin museo den dje, ta e base di loke nan ta mira tin cu tuma luga na San Nicolas.
Manera a papia cu SNBA, Otmar Oduber a bisa cu dos decision cu PPA lo tuma asina nan drenta den gobierno ta crea incentivonan fiscal pa San Nicolas pa inversionnan tuma luga y pa desaroya e terenonan di e refineria. Aki el a menciona cu lo crea un San Nicolas Port Authority, percura pa e waf, cu ta un di e mihonan cu tin den Caribe, worde hinca den un autoridad oficial y worde desaroya pa carga y hasta turismo, creando un spin off di e hotel.
“Nos no mester priminti San Nicolas nada mas, nos mester sigui traha riba e fundeshi cu tin caba, pero cu hendenan cu tin curashi y cohon pa tuma decisionnan y hunto cu SNBA traha riba e desaroyo pa Aruba su proximo decadanan di turismo. Aki na San Nicolas ta unda e diferencia ta di loke a worde crea durante e ultimo 40 añanan pabou di nos isla. San Nicolas ta bira e next exito di turismo di Aruba si nos haci’e bon, si nos crea e ciudad cultural y di herencia si nos haci’e bon y cu conviccion cu nos ta bay logre di berdad”, Otmar Oduber a conclui.
