MEP ta convenci
ORANJESTAD (AAN): Recientemente mester a cera e edificio di Hulpbestuurskantoor San Nicolas cu urgencia debi cu e edificio tabata den hopi mal estado.
Sindicato a bati na porta di gobierno y gobierno a actua rapidamente pa cera e lugar pa asina ni trahadornan ni usuarionan worde exponi na e peligernan.
A ubica e trahadornan mientrastanto na Hulpbestuurskantoor Savaneta mientras ta trahando riba un lugar den San Nicolas pa habri back. Ta trata di un oficina cu ta atende cu publico y cu placa y pesey mester busca ‘toonbank’ y otro articulonan adecua.
E trabaonan lo tin un duracion di entre 6 pa 8 siman y unabes cla, Hulpbestuurskantoor lo ta back na San Nicolas.
Origen di problema: E origen di e problema ta cu gobierno di AVP a bende e edificio na SOGA cu e intencion pa traha un MFA eynan. SOGA ta esun cu a construi tur e otro MFA nan. Pero manera cu SOGA mes a publica den prensa, no a resta placa pa e MFA aki. Asina un decision descabeya y iresponsabel a hinca trahadornan y usuarionan den peliger.
Ta di elogia cu Gabinete Wever-Croes 2 a actua mesora cu sindicato a bati na porta pa asina proteha trahadornan y usuarionan.
