Parlamentario Jennifer Arends-Reyes na Parlamento Hubenil Camp:
ORANJESTAD (AAN): Parlamentario Jennifer Arends-Reyes a participa recientemente na Parlamento Hubenil Camp, unda el a brinda un charla y comparti directamente cu e hobennan participante tocante trabou di parlamento, liderato y e importancia di participacion civico.
Durante su presentacion, Arends-Reyes a splica e responsabilidad cu representacion publico ta trece, e rol fundamental di parlamento den nos democracia y con decisionnan politico tin un impacto directo riba bida diario di cada ciudadano.
“Pa mi ta importante cu nos hobennan no mira parlamento como algo cu ta leu for di nan realidad. Parlamento ta pertenece na pueblo, y e generacion nobo mester sinti cu nan tin un espacio, un voz y e posibilidad pa contribui na futuro di Aruba,” Arends-Reyes a expresa.
E encuentro a brinda e hobennan oportunidad pa haci pregunta, comparti nan ideanan y conoce mas di cerca con trabou parlamentario ta funciona. Segun Arends-Reyes, intercambio directo cu hubentud ta esencial pa stimula interes den democracia, liderato y servicio na comunidad.
“Nos mester crea mas oportunidad pa hobennan conoce nos institucionnan, expresa nan opinion y compronde cu participacion no ta cuminsa solamente ora nan yega edad pa vota. E ta cuminsa cu haya interes, haci pregunta y envolve nan den loke ta pasa den nan comunidad.”
Arends-Reyes a felicita e organizadornan di Parlamento Hubenil Camp pa e iniciativa, y a reconoce specialmente e hobennan participante pa nan entusiasmo, curiosidad y deseo pa siña.
“Cada biaha cu mi por comparti cu hobennan, mi ta sali inspira. Nan tin ideanan, nan tin pregunta y nan tin un vision propio di con nan kier mira Aruba den futuro. Nos responsabilidad como lider ta scucha nan y crea e espacio pa nan por sigui desaroya.”
Finalmente, e parlamentario a enfatisa cu inverti den hubentud ta inverti den futuro di Aruba. Pa e motibo aki, Parlamento mester sigui acerca su mes cada bes mas na e generacion nobo y stimula nan participacion activo den sociedad.
“Nos democracia ta bira mas fuerte ora nos hobennan sinti cu nan ta parti di dje,” Arends-Reyes a conclui.
