Segun Parlamentario Muzannin Wever, Futuro:
- Hopi mayor ta busca scolnan alternativo pa nan
ORANJESTAD (AAN) Matutino DIARIO a entrevista señora Muzannin Wever, Parlamentario di Fraccion di Partido Futuro, y alavez Vicepresidente di Parlamento, riba e tema di enseñanza y e mundo di tecnologia den cual Aruba ta kedando atras.
E Parlamentario a referi na un generacion di hoben, cu ta lantando awo den full un otro mundo di tecnologia y stimulacion mental pa medio di apps y tur desaroyo digital cu tin.
Muzaninn a expresa: “Nos scolnan na Aruba ta kedando hopi atras, den e mundo di tecnologia aki. Locual tin den e programa di gobernacion, actualmente, ta pa empodera e maestronan tambe cu e tools necesario pa nan por funciona den e mundo tecnologico aki, pa nan por ofrece algo un poco mas stimulante pa e studiantenan, pa lesnan por ta mas informativo y interesante pa nan tambe”.
Wever a splica cu tin diferente cos cu ta wordo uza actualmente, cu ta haci hasta pa e docentenan dificil pa controla, por ehemplo, documentonan plagia cu ta wordo entrega y ta conoci cu esaki ta parti di e muchanan di awendia. Pero nan tin cu uza e ID den nan lesnan, wak con ta acopla e siñamento hunto cu e uzo digital di informacion.
“Anto tur esaki ta forma puntonan di atencion, cu e gobernacion aki ta bay tin, pa cu enseñanza den e tereno eynan”, Muzaninn Wever a señala.
“ Na Aruba tin hopi scol cu, précis, pa e motibo aki cu e muchanan ta haya nan nada interesante pa sigui scol, cu bo ta haya cu mayornan ta busca scolnan alternativo, pa nan yiunan. Hopi mayor ta saca nan yiu for di educacion escolar regular, anto hinca nan den scolnan priva, manera bo tin diferente hibrido zorg, parti online, parti personal, cu nan ta creando un situacion na unda cu scolnan mester haya nan acreditacion, p’asina e muchanan cu ta completa e tipo di scolnan alternativo aki, tambe por haya un cualificacion na final, cu tambe ta wordo acepta aki na Aruba”, Parlamentario, señora Wever a señala.
El a agrega cu e scolnan aki, podise ta ofreciendo enseñanza di calidad pero ainda e no a wordo acepta cu su acreditacion regular, anto por tin cierto problemanan cu esaki ta bin cu ne.
“Mirando cu tin un interes grandi pa e forma di enseñanza alternativo aki, nos tin cu percura tambe pa e tipo di scol aki haya acreditacion, cu nan a wordo monitor, evalua, pa e muchanan cu ta bay completa e tipo di enseñanza aki, no cay den problema cu un diploma cu no ta wordo reconoci na Aruba, of na un siguiente stap, un doorstroom oa un scol avanza”, Parlamentario Muzaninn Wever a remarca.
