Ministro Geoffrey Wever:
ORANJESTAD (AAN): Dialuna merdia net na entrada di Stadhuis na Playa, Partido RAIZ a duna un presentacion pa splica cu nan semper lo keda defende Derecho Humano. Aunke no ta di acuerdo cu Gobierno a bay cassatie, toch nan sa cu aki ta un pais democratico y e plataforma aki ta acepte.
Ministro Geoffrey Wever di RAIZ, a bisa cu a yama e conferencia di prensa pa reafirma na pueblo e posicion di e Partido, cu nan ta para pa igualdad, ta na fabor di igualdad, ta para pa inclusion, y a yega di menciona esaki na varios momento, y nan no a cambia nan posicion.
“Nos ta orguyoso cu Parlamentario Misha Raymond di RAIZ ta co-firmante di e ley iniciativa cu ta bay haci igualdad posible na Aruba. Nos ta orguyoso di e participacion ey, y nos sa cu e plataforma lo vota pro pa e ley aki ora e wordo trata den Sala di Parlamento, y den e sentido ey 2023 lo ta un aña historico pa Aruba. Mi ta kere cu nos como plataforma por ta orguyoso tambe di nos dos Parlamentarionan cu lo vota pa e ley aki, pa haci’e posible na Aruba,” Wever a indica.
El a splica cu nan a tende diferente opinion, a comparti nan pensamento cu organizacionnan den comunidad, y pa na nan ta importante pa reafirma y confirma cu nan ta para pa igualdad.
Cu esey, Partido RAIZ ta mira cu nan lo bay haci un cambio real den e panorama, no solamente e aspecto huridico, pero pa e personanan cu ta biba na Aruba.
E topico aki no ta djis “cassatie” cu un “ley”, pero e aspecto importante ta “personanan”, esta hendenan y nan ta kere cu esey mester hiba bek den e discusion tambe pa ora cu ta papia di e topico, lo papia cu respet pa cada persona.
Ministro Wever a tuma nota cu tin algun grupo cu ta expresando nan mes na un forma no-respetuoso dirigi riba e grupo aki, y esaki ta algo cu nan kier contribui na e causa y corda cu ta trata di hende, di e ser humano, cu tin famia, cu tin amigonan, y nan merece di haya un trato igual, un trato riba nivel, y un trato di respet.
