Evelyn Wever-Croes di MEP:
ORANJESTAD (AAN): Durante e conferencia di prensa di 26 di oktober, Lider di Fraccion MEP a pone atencion riba e debate riba e ley di reino HOFA y e importancia pa Aruba sigui proteha su autonomia, mientras cu e pais mes ta fortalece su situacion financiero.
MEP ta defende disciplina financiero, reduccion di debe publico y maneho responsabel di e entradanan di nos pais. Pero e logro financiero di Aruba no mester bira un motibo pa acepta condicionnan cu por limita nos derecho pa tuma decisionnan den nos propio interes, y perhudica nos di sigui crece mañan.
E pregunta fundamental ta: pakico Aruba lo cambia un sistema di supervision financiero cu a resulta den disciplina y resultado positivo, pa un modelo nobo cu por trece mas limitacion riba nos autonomia?
Lider di MEP ta insisti cu cualkier decision di e magnitud aki mester ta basa riba argumento concreto, transparencia y un evaluacion serio di e consecuencianan financiero, constitucional y politico pa Aruba. Nos Parlamento mester tin espacio pa analiza e propuesta di ley y su implicacionnan, y pueblo di Aruba merece claridad riba loke ta na wega.
Disciplina financiero y autonomia no ta contradeci di otro. Aruba por sigui reduci su debe, fortalece su economia y cumpli cu su responsabilidad financiero sin pone su derecho di autodeterminacion na riesgo.
MEP lo sigui defende un Aruba cu ta maneha su finanzas cu responsabilidad, pero cu ta conserva e libertad pa determina su propio futuro.
Autonomia no ta un obstaculo pa progreso. E ta parti esencial di nos futuro.
