Parlamentario Endy Croes (MEP):
*E unico conseho directo tabata pa kita e cartera di finansa for di man di AVP
ORANJESTAD (AAN): Parlamentario Endy Croes a splica cu e hendenan cerca di Geoffrey Wever a busca conseho na mas cu un ocasion cerca partido MEP durante nan negociacion pa forma gobierno. Aparentemente Futuro tin hopi dificultad pa confia AVP. Como cu nan ta carece di experencia nan tabata manda e hendenan prominente den nomber di Geoffrey Wever pa busca conseho cerca MEP.
Conseho consiso pa percura pa AVP no haya e cartera di finansa:
Conseho di MEP na e grupo cerca di Geoffrey Wever cu tabata lobby y busca conseho constantemente tabata pa percura cu AVP no haya e cartera di Finansa Publico. Mike de Meza di AVP desde 2009 pa 2013 a maneha Finansa Publico y a laga esaki na werki. Despues Juan David y Bermudez a atende Finansa Publico como ex - ministernan pa AVP di aña 2014 pa 2017.
Nan a logra crea e mega debe, a logra un KB, a logra Ley di LAFT, a logra trece CAFT Aruba, a logra cu Hulanda a laga destrui Presupuesto 2014 aproba pa Parlamento, a logra cu Mike a bay den welga di hamber pa despues logra entrega parti di nos Status Aparte. Un maneho desastroso cu a wordo considera e desaster di siglo.
AVP a redobla debe di Pais Aruba y a presta 2200 miyon florin sin cu tabatin un pandemia. Pa e rasonnan aki nos ta pagando awe casi 300 miyon pa aña solamente na interes riba e placa presta pa AVP. Pues momento cu e hendenan di Geoffrey a acerca MEP pa conseho e unico conseho cu MEP a keda consistente riba dje ta cu FUTURO no mag di laga e cartera di finansa bay pa AVP y percura pa AVP dobla. Nos por mira atras cu e hendenan yega na Geoffrey Wever y FUTURO a tuma e conseho aki cu dos man. Nos a compronde cu AVP a sapatia, pero finalmente Mike Eman y AVP a dobla pa e proceso di formacion por a continua.
Nos no por divulga tur cos, pero di curason nos no kier pa AVP kibra tur e logronan di e gobierno actual riba e tereno financiero y hinca Aruba bek den debe y den cora. Mike a grita den parlamento cu e ta orguyoso di e debe y cu e debe tey pa nos tur bay page den FUTURO.
Finalmente, awor AVP y FUTURO mes lo mester percura pa sigui paga e mega debe cu AVP a ocasiona. Nos consehonan tabata gratis y consiso y di un banda por a mira cu e conseho a wordo cristalisa den realidad.
