Segun Parlamentario di Fraccion di AVP, Muzannin Wever:
ORANJESTAD (AAN): Gobierno di Aruba mester percura cu e tin e fondonan pa cumpli cu su compromisonan cu cierto gruponan, den e caso aki, cu esnan den enseñansa. Di otro banda, mester laga otro compromisonan cay si no tin fondo pa cumpli pa via cu ainda Aruba no ta cla cu e ley di Reino. Asina Parlamentario di Fraccion di AVP, Muzannin Wever, den un entrevista cu DIARIO.
El a remarca riba e hecho cu no ta solamente na Aruba tin falta di docente pero esaki ta algo cu ta pasando mundialmente. El a bisa cu na Aruba mester bin cu formanan creativo pa atrae mas maestro. Entre otro el a menciona e ‘studieopdrachten’ cu antes tabatin na unda cu Gobierno tabata paga e estudio segun e necesidad. Segun e, IPA posiblemente tambe mester revisa y adapta su oferta pero, e ta expresa cu algo sigur mester sosode pa logra incentiva mas docente y Fraccion di AVP lo sostene iniciativanan aki.
E pago y beneficio di docentenan na Aruba no ta mescos cu esunnan di Hulanda y Boneiro pa cua motibo hopi docente ta opta pa bay traha na Boneiro. Parlamentario Wever a señala cu Minister di Enseñansa Gerlien Croes ta trahando riba mehoracion di esakinan. E aña aki caba e maestronan a ricibi e prome fase di aumento salarial. El a menciona cu e proceso aki tin tres fase y ministerio di enseñansa ta trahando riba e di dos fase. Fraccion di AVP lo pusha pa e negosacionnan finalisa pa asina e fase aki tambe drenta.
“Mi sa tambe cu hopi di e cosnan aki ta bay for di e asuncion cu e ley di Reino tambe ta bay door pasobra hopi di e cosnan aki ta mara na placa”, e parlamentario a remarca.
El a duna di conoce cu Gobierno mester percura cu e tin fondonan pa cumpli cu su promesa y compromiso cu cierto grupo di hende. “Y mi ta comprende cu e hendenan aki kier pa tin cumplimento cu e promesanan aki, di otro banda Gobierno tambe mester percura cu e tin e fondonan aki. Kiermeen ora cu Gobierno tin cu bay cumpli cu cierto gruponan cu e tin compromiso cu ne, un otro banda mester cay pa via cu por ta e fondonan no ta ey e momentonan eynan pa via cu ainda nos no ta cla cu e ley di Reino”, Parlamentario Wever a expresa.
