Parlamentario Hendrik Tevreden
ORANJESTAD (AAN): E lider di fraccion di MEP, Hendrik Tevreden, a incica cu na Aruba a ripara cu tin hopi hende cu tabata nervioso pa motibo di e resultado di eleccion na Hulanda.
“E resultado ya ta conoci y hopi di boso sa di e resultado aki unda cu PVV, partido di e conocido Sr. Wilders a gana electorado cu 24 %. Wilders semper a papia sin wanta nada atras y cu ta haci cu hopi hende tin hopi pregunta con e lo bay goberna si e yega na forma coalicion. E aumento di voto pa nan partido tabata bastante grandi y awor ta inevitabel pa nan bira rond di e resultado aki. PVV ta e partido di mas grandi na Hulanda”, asina lider di Fraccion di MEP, Hendrik Tevreden a indica den rueda di prensa di fraccion.
El a continua bisando cu 16% di voto a bay pa GroenLinks y Partij van de Arbeid (PvdA) cu a combina lista y asina a bay eleccion. Nan a crece tambe substancialmente cual ta mustra cu combinacion di lista por funciona. PvdA ta un partido ruman di Movimiento Electoral di Pueblo (MEP) y nan tambe a crece den locual tabata e eleccion cu a pasa na Hulanda esaki lo por ta importante pa si acaso nan drenta coalicion cu PVV.
E partido cu ta na mando di Sr. Rutte a bay atras. Tabatin 15 % di electorado y e partido nobo NSC di Pieter Omtzigt a sali cu 13% y D66 di Rob Jetten tambe a bay atras y tin solamente 6 % di electorado y na Aruba a haya ningun voto. El a reitera cu na Aruba hopi hende ta nervioso pasobra ta puntra con ta bay traha cu Sr. Wilders y tin hende cu te hasta ta poniendo presion pa Gobierno caba di atende cu e Gobierno demisionario di Den Haag, den e caso aki cu Señora Van Huffelen pasobra tin miedo pa sinta na mesa cu Sr. Wilders.
"Mi kier pone esaki bon cla, cu nos tin e confianza den e Gobierno di Aruba cu mescos cu nan a sinta na mesa e tempo ey cu Sr. Knops, cu tabata un tercio hopi dificil, hopi riguroso y bay den un direccion cu eigenlijk nos no tabata desea. Pero asina tambe a sinta na mesa cu Van Huffelen y Gobierno a demostra di por atende cu cada caso y su dificultad debidamente. Semper a atende cu e ponencianan cu a worde treci, a keda na mesa negocia den un forma madura y asina trece solucionnan y haya consenso", Tevreden a remarca.
Esaki lo ta e mesun pasonan cu lo worde tuma si acaso PVV forma Gobierno y si acaso nan tin un Secretario di Estado cu lo ta di banda di PVV. Mesun manera nos ta kere cu Gobierno di Aruba lo por negocia y yega na un miho 'deal' pa locual ta e punto principal pa pais Aruba, asina Parlamentario Hendrik Tevreden a indica.
E Arubianonan no mester bira nervioso cu e salida di Van Huffelen. Tin cu mantene e postura, haci cosnan corecto, pensa bon como tambe mantene un base huridico corecto pa por bringa pa e solucionnan cu pais Aruba tin mester y cu ta buscando pa e pais progresa sin importa ken ta den Gobierno na Hulanda.
Palabracionnan tin cu bay a base di consenso y basa den Statuto y esaki tin cu trece trankilidad pasobra e fundeshi pa maneho ta mara na un proceso y ningun gobernante por yega hisa benta na un manera descabeya. Na e diferente medionan o hendenan cu ta purba di instiga, keda trankil, Gobierno sa con pa negocia, e Parlamentario a añadi.
Importante ta pa nos tur keda corda cu e meta ta, pa Gobierno di Aruba sigui na mesa negocia y logra un reduccion di e interes di 6.9% pa un mas abao.
