ORANJESTAD (AAN) – Minister di Enseñanza, Ciencia y Desaroyo Sostenible, señor Rudy Lampe, den conferencia di prensa di gobierno Diahuebs, a splica kico iniciativa nobo “Ban Yuda” ta y di kico e ta
consisti.
E mandatario a menciona cu aworaki ta wordo papia rond mundo di e “Anywhere School Initiative” cual ta e base pa e proyecto “Ban Yuda”. Esaki ta nifica cu unda cu e mucha ta, e por bay scol, sea e mucha ta na cas, na biblioteca, etc., pero mester asegura cu tin un punto di acceso (hot spot). E mandatario a bisa cu ta bay crea mas punto di acceso na Aruba.
“Pa asina aki e hoben por conecta, si nan no por hacie na cas. Nan mester di un “devise” pa drenta den e sistema di enseñanza. Nan ta haya henter e guia den e plataforma digital aki y cu e code ey nan por ‘lock in anywhere’. Nos a cuminza aplike caba cu landsexamen ‘new style’. E kiermen cu e hobennan cu ta preparando pa MAVO, HAVO of VWO Diploma, aworaki, cu antes nos tabata yama Avond Mavo of Avond Havo, y no tabata tin VWO, awo Enseñanza ta ofreciendo esey”, Minister Rudy Lampe a splica.
Resumiendo: e hoben ta haya un code, e ta inscribi, ta lock in, y e ta hay tur su material digital pa prepara su mes pa e Landsexamen. “Kiermen, esey ta e idea di anywhere school cu ta un proyecto di Fundacion Ban Yuda”, e dignatario a señala.
Minister Lampe a agrega cu si haci esaki individualmente ta sali hopi mas caro, pero door cu e Fundacion Ban Yuda a negocia cu e diferente plataformanan cu tin, nan a logra nan a haya un prijs mucho mas accesible pa Aruba, y esey ta beneficia e mayornan si nan ta inscribi nan yiunan pa e sistema aki, via Fundacion Ban Yuda.
Ambos iniciativa, CEDES y Ban Yuda ta independiente di gobierno. Kiermen, gobierno no ta aporta fondonan pa e tipo di enseñanza alternativo aki. “Nos tin cu bay den e posibilidad di Public Practical Partnership, cu ta iniciativanan di ciudadanonan di e sector priva y cu aworaki cu cooperacion di gobierno, manera nos a haci tambe cu otro iniciativanan cu nos a anuncia, manera scol di Montessori, nos a duna cierto subsidio indirecto. Den e caso di e dos iniciativanan menciona ainda no. Nan ta operando completamente riba nan mesun forza y e forza di e mayornan cu ta contribui, pa asina aki nan yiunan por ricibi educacion”, e mandatario a splica.
El a agrega cu e no por exclui cu si na dado momento e demanda ta bira hopi grandi y tin mayornan cu kier e alternativa aki pero no por pagu’e, anto ta obligacion di gobierno pa bisa pone e mucha su derecho di haya enseñanza central, y yuda pa e mucha por ricibi su educacion.
