Eduard Pieters di PPA encuanto crisis na Censo:
ORANJESTAD (AAN): Durante e rueda di prensa semanal di fraccion di PPA, parlamentario Eduard Pieters a bolbe trece un problema, cu ta creciendo den silencio, pero cu ya a bira inaceptabel: e caos den sistema di Censo Aruba. Loke cu mester ta un proceso basico di inscripcion, a bira un obstaculo grave pa un cantidad di hende cu kier traha y contribui na Aruba.
Segun Pieters, desde januari caba tin problema cu registracion na Censo. Fraccion di PPA a bati alarma di e problema aki den luna di maart, pero awe cu ya nos ta drentando luna di mei, ainda no tin niun solucion concreto.
Hende no ta logra haya cita pa inscribi na Censo, algo cu directamente ta afecta p.e. e studiantenan cu ta bin bek for di exterior y cu kier reintegra den mercado laboral di Aruba. E resultado ta un situacion caotico, unda hende ta keda blokea, sin posibilidad pa bay dilanti.
Pieters no ta evita pone responsabilidad unda e mester ta. Segun Pieters, esaki no ta un falta di e trahadornan di Censo, sino un problema di maneho politico. “E problema aki tin nomber y fam,” el a bisa, señalando directamente na Minister Artur Dowers y Minister Mike Eman. El a critica e decision cu nan a haci, pa legalisa miles di persona, sin prepara e cadena completo di proceso, ignorando e impacto riba e departamentonan, manera Censo y AZV.
Pa Pieters, esaki ta un ehempel cla di mal gobernacion, unda ta tuma e decisionnan sin planificacion debido y alinea y pa colmo sin coordinacion entre e ministerionan, creando un efecto domino cu finalmente ta perhudica unicamente e ciudadano.
Trahadornan ta carga e culpa di mal maneho: Un punto importante cu Pieters a enfatisa ta, cu e critica no ta dirigi na personal ni director di Censo. Al contrario, el a reconoce cu Censo como institucion semper a traha duro y a mehora su proceso den e añanan cu a pasa.
Pero segun Pieters, e decisionnan politico actual ta pone un carga inhusto riba e trahadornan, creando un imagen negativo pa un departamento, cu no ta responsabel pa e caos actual.
Fraccion di PPA no a keda na critica solamente. Ya for di dia 30 di maart, nan a presenta 18 pregunta formal na gobierno tocante e situacion aki. Awe, casi un luna despues, ainda no tin niun contesta. Pa Pieters, esaki ta inaceptabel y ta mustra falta di transparencia, respet y urgencia cu e situacion aki.
“Un gobierno cu no responde, ta confirma cu no tin control riba su propio sistema,” el a indica.
Impacto real: hende sin trabou, sin seguro, sin proteccion
Mas cu politica, e impacto di e crisis aki ta humano y directo. E studiantenan of adulto cu a bolbe Aruba pa traha no por firma contracto, paso nan no ta inscribi. Pues nan ta keda na cas, sin entrada, sin seguro di AZV, sin proteccion, pues casi un ilegal riba nan propio isla natal.
Pieters a lansa un pregunta serio: ken ta para responsabel si algo pasa cu e hendenan aki? Si tin un accidente, un problema di salud?
Un contradiccion peligroso den politica di retorno: E situacion ta bira ainda mas grave, ora bo mira e contradiccion. Gobierno ta promove campaña pa motiva nos hobennan Arubianonan bin bek Aruba pa traha, pero den practica, nan no por ni registra nan mes ora nan yega. Pa Pieters, esaki ta un falta total di coherencia politico.
“Con bo ta invita hende bin bek, pero bo no por ofrece nan ni un sistema funcional pa cuminsa?” el a cuestiona.
Pa Pieters, e mensahe final ta directo y fuerte. E crisis na Censo no ta un accidente, ta un resultado directo di mal decision, falta di coordinacion y ausencia di liderazgo y bon gobernacion. Pueblo ta paga e prijs di un gobierno cu no ta planifica ni responde.
