Parlamentario Endy Croes:
*Mike Eman a papia den nomber di Gerlien Croes
ORANJESTAD (AAN): Parlamentario Endy Croes ta relata cu diabierna ultimo Parlamento tabata tin un Besloten Bijeenkomst unda a trata update di Rijskwet di supervision financiero tras di portanan cera. Aunke Fraccion di MEP a protesta fuerte por escrito y tambe momento cu e reunion a inicia e manera di procede cu un tema asina importante, e Presidente di Parlamento Sr. Sneek a haci un promesa den e reunion aki cu lo yama un reunion publico pronto pa pueblo tambe por sigui e desaroyo di dicho tema.
Gerlien Croes 5 ora den Parlamento sin hiba palabra
Ministernan Mike Eman, Geoffrey Wever y Gerlien Croes a wordo compaña pa profesionalnan kendenan riba e nivel di ambtenaar a negosha e tema di Rijkswet. Milly Schwengle a lidera e negociacionnan mientras Derrick Werleman Director di Directie Financiën y George Croes Director di DWJZ ta entre otro nos profesionalnan cu a hiba e negociacion. Unabes esaki wordo finalisa lo traspasa esaki pa gobierno unda ministernan riba bestuurlijk niveau lo sigui negosha cu politiek Den Haag. Mester aplaudi e profesionalnan kendenan cada un a duna nan maximo durante e aña tras di lomba den e cuadro cu nan a ricibi pa traha riba e proyecto di Ley di Reino hunto cu e team di Hulanda. Durante e Besloten Bijeenkomst Mike Eman tabata esun cu a contesta tur preguntanan politico relaciona cu e tema Rijkswet.
Locual a resalta ta cu e Minister cu ta oficialmente encarga cu Asuntonan di Reino (Koninkrijksrelaties), esta Gerlien Croes a sinta 5 ora den Parlamento sin hiba ningun palabra. Pone nos recorda e cancion di Shakira “Ciego, Sordo Mudo”. Gerlien tabata 5 ora bezig den su computer y celular sin mustra e amor patria of interes riba e tema.
No por lubida e lucha tenaz cu pueblo di Aruba lidera pa Betico Croes a hiba pa logra su Status Aparte y libertad di e pueblo aki. Pesey e tema di Rijkswet ta un tema cu hopi sentimento pa henter e pueblo di Aruba y no sin mas mester “bulldoze” algo cu por wordo regla na un diferente manera. Bo no ta compronde e balor si nunca Bo a lucha pe of a traha pa logr’e. Pesey pueblo a wordo pidi tambe pa conserva y cuida locual nos a logra manera un clompi diamanta! Spera cu sano huicio por prevalece.
Partido Futuro ta entreguista y ta trek AVP cu nan:
Locual ta keda straña nos ta cu AVP te cu na aña 2024 tabata tin un postura fuerte “contra” Rijskwet cu Hulanda kier impone riba Aruba na un manera despropocional. Desde cu AVP a forma gobierno cu Futuro el a cuminsa papia idioma di Futuro un partido sin conocemento di negosacion y lucha y historia di nos autonomia. Riba pagina 8 di programa di partido Futuro tambe nan a campaña cu “Finalisa introduccion di un Rijkswet riba supervision financiero”. Parlamentarionan nobo di AVP a expresa recien cu Rijkswet ta un “done deal” sin cu nunca Parlamento a ricibi ni un draft pa lesa. Con bo por representa Bo pais y bo votadonan na un manera digno asina aki? Parlamentario Endy Croes a tuma nota cu Parlamentarionan di Futuro ya caba a entrega parti di nos autonomia sin nunca a ricibi e documento aki pa lesa.
Pero di AVP nos no a spera esaki. Pesey Parlamentario Croes ta considera Futuro un partido di entreguista. Partido MEP lo bay keda critico riba e tema aki. Mester bisa cu locual a wordo presenta diabierna ultimo door di e team di profesionalnan ta un adelanto y mehoracion substancial di locual Knops kier a pusha Aruba cune durante e pandemia na juli 2020 pero ainda tin hopi espacio politico pa negosha riba un otro nivel.
Punto di salida mester ta cu Aruba pa 40 aña desde Status Aparte a presta placa riba mercado internacional y nunca nunca a cay den default y semper a cumpli. Pues e “condicionnan politico” ainda ancra den e ley di Reino cu a wordo presenta pa cu e placa cu Hulanda a presta Aruba den un pandemia tin espacio suficiente pa yega na algo mucho mas miho.
Spera e politiconan den funcion tin e curashi pa hiba e negociacion na un otro nivel y den e direccion beneficioso. Spera cu Parlamentarionan di AVP kisas por recapacita. Placa no ta tur cos den bida! Hulanda por trata nos cu mas respet y ancra esaki den art 38 di e Statuut existente bou Onderlinge Regeling mescos nos a logra haci cu COHO y Landspakket Parlamentario Croes ta termina splicando.
