E ta 'join' partido nobo di Gerlien Croes
ORANJESTAD (AAN): Den fin di siman, cu un paso inovador pa e panorama politico di Aruba, FuTURo orguyosamente ta anuncia un acuerdo historico. Lider oficial di e partido nobo, mr. Gerlien Croes ta comparti su responsabilidad cu mr. Geoffrey Wever, marcando asina, pa prome biaha den historia politico di Aruba, e hecho cu un partido ta adopta un modelo di liderazgo conhunto.
E concepto aki ta kibra cu e status quo di politica tradicionalista pa habri caminda na e cambionan cu e desafionan di e temponan actual ta exigi, esta di modelonan innovador di liderazgo. Uniendo forsa entre dos profesional dinamico, FuTURo ta pone e bon gobernacion, bienestar general, transparencia y unidad na prome luga; balornan cu ta fundeshi di e partido.
Croes, cu su experiencia den parlamento, ta continua como lider oficial y legal di FuTURo, mientras cu Wever lo aporta na e liderazgo politico y ehecucion di e vision di partido for di e experiencia obteni den e ambito gubernamental. Hunto, lo guia e partido cu un vision comparti cu tin como obhetivo representa e interes di tur Arubiano y traha na bienestar di e isla, basa riba e idealnan di Bon Gobernacion, Transparencia, Unidad y Representacion.
“E acuerdo aki ta bay mas leu cu dos lider,” asina Gerlien Croes a indica. “Ta trata di un manera nobo di traha pa e futuro di nos pais. Nos ta comprometi na haci loke ta corecto pa Aruba, y esey ta loke a trece nos na e punto aki, di tin e curashi y humildad pa kibra cu pensamento anticua y construi hunto e futuro cu nos tur merece.”
Di su banda, Geoffrey Wever a expresa cu “E colaboracion aki ta demostra cu e mentenan profesional nobo den politica por traha hunto pa e bienestar di tur cuidadano, lagando un banda e ambicion individual y na su luga pone e beneficio di pueblo. Mi ta sinti mi honra di asumi e responsabilidad aki hunto cu Gerlien Croes pa hunto lucha den trece un impacto positivo duradero.”
E posicion aki di FuTURo ta un testimonio di e dedicacion di e partido pa cu progreso; y cu liderazgo real ta bin for di colaboracion. Na momento cu e isla ta enfrenta retonan compleho, e liderazgo dual di FuTURo ta priminti un modelo di gobernacion mas inclusivo, transparente y cu bista pa futuro. Exactamente loke tin mester pa atende cu e momento transcendental di Aruba.
