Parlamentario Rocco Tjon:
ORANJESTAD (AAN): Diabierna siman pasa Parlamento a trata presupuesto 2025 di pais Aruba. E presupuesto a wordo aproba unanimamente. Nos ta wak bek riba un reunion positivo, aunke cu Gobierno a haci diferente cambionan, cu tin nos preocupa, y cu nos lo keda vigila di cerca.
GABINETE EMAN III A KITA 20 MIYON FLORIN PA TRAHA CAS SOCIAL
Un di e cambionan cu a ser haci y presenta pa Minister Geoffrey Wever ta cu a kita 20 miyon florin cu tawata destina pa traha cas social pa nos pueblo. Alabes e parti di e suma aki lo a nifica cu lo por reduci of stabilisa e huur cu esnan cu ta biba den un cas di FCCA ta paga.
EMAN A KITA PLACA DESTINA PA ENSEÑANSA Y SECTOR SOCIAL
Tambe Minister Geoffrey Wever a presenta un cambio cu ta contene un reduccion di 10% pa tur departamentonan di gobierno. Nos por a wak reducionnan proponi por ehempel pa e sector di Husticia y Social na 6.2 miyon florin, pa Enseñansa y Deporte na 2.9 miyon florin y pa Salubridad Publico na 1.4 miyon florin.
Ta mas cu logico cu e cambionan aki ta bay perhudica e bon funcionamento di e departamentonan aki y consecuentemente e servicio cu ta wordo brinda.
PA CONCLUI
Apesar di e cambionan aki, cu nos no ta sostene, y nos a vocifera esaki durante reunion, den prensa y por escrito, nos a sostene e presupuesto, mirando cu e ta na bienestar di pais Aruba y tur hende cu ta biba akinan.
E siman aki nos lo manda hopi pregunta pa e ministernan en cuestion, nos lo cuminsa bishita e diferente departamento y fundacionnan, pa asina prepara cambionan cu nos ta bay propone durante presupuesto supletorio.
