MEP na Gerlien Croes: Violacion di nos constitucion
ORANJESTAD (AAN)- Fraccion di MEP den Parlamento a manda un carta cu pregunta na Minister di Gerlien Croes tocante e declaracion publico di Minister Herde cu lo ta usa e experticio di miembro di Parlamento Mike de Meza den su funcion ministerial.
Segun MEP, esaki ta un situacion sumamente grave, pasobra De Meza tabata candidato pa minister di Infrastructura, Energia y Comunicacion, pero no a pasa e screening. A pesar di esaki, e minister nobo, sr. Herde, tin pensa di envolve De Meza den maneho ministerial manera un “consehero tras di cortina”, loke ta contra e principio di separacion di poder segun articulo III.7 di e Constitucion di Aruba.
“Partido Futuro tabata supuestamente promotor fuerte di bon gobernacion y respet pa ley durante e campaña. Awor cu un miembro di Parlamento cu no pasa screening ta wordo uza pa “goberna” for di tras di cortina, nos mester sa si Futuro ta duna su aprobacion pa esaki.
Den e carta cu Fraccion di MEP a manda pa e minister, ta pidi Minister Croes pa aclarea si:
si Futuro a bay di acuerdo cu esaki;
si Futuro ta na altura cu esaki ta contra e Constitucion;
si tin un acuerdo ta existi entre AVP y Futuro pa permiti rol informal di Mike de Meza;
y si Futuro ta dispuesto pa tuma distancia for di e practica aki.
MEP ta conclui cu si Futuro ta opone, por existi un mayoria parlamentario pa presenta un mocion di desconfiansa contra Minister Herde.
“Tur minister, y specialmente esnan cu ta boga pa bon gobernacion, mester scohe: of bo ta defende integridad y Constitucion, of bo ta complice den su violacion,” Lider di Fraccion di MEP, Evelyn Wever-Croes ta conclui.
E fraccion ta spera un contesta di Minister Croes dentro di 2 siman.
