Parlamentario Alvin Molina (MEP):
ORANJESTAD (AAN): E ta sigur un bunita gesto, pero mas ainda e ta algo asina necesario. Nos tur conoce un hende cu pa un of otro motibo a haya nan mes den un situacion cu nan tin mester di sanger. Sea un famia, un amigo, un bisiña, un colega of miembro di un club deportivo.
Kisas abo mes a experencia cu e sanger a yudabo recupera bo salud di un accidente, un operacion of un malesa cronico. Danki Dios nos ta bendiciona cu profesionalnan den nos sistema di cuido medico cu ta percura pa esaki. Y sigur danki na e donantenan di sanger. Arubianonan cu literalmente ta duna di nan mes pa salba bida di un otro ser humano.
Mi ta corda storianan cu antes ora bo drenta scol di polis automaticamente bo ta bira donante di sanger. Algun bes pa aña bus yen di aspirant ta bai bloedbank pa asina nan duna di nan parti pa yuda salud di nos prohimo.
Hopi di esnan di e tempo ey te ainda ta duna sanger, nan a sinti e proposito di duna bek na comunidad di e forma aki. Sigur esaki ta algo bon pa Minister di Husticia y hefenan di departamento reintroduci. Tin hasta dunado di trabou cu ta coopera cu nan coleganan y laga nan bai bloedbank durante ora di trabou. Un elogio sigur pa e doñonan di trabou aki y un bon manera pa otro companianan tambe por contribui na nos pais.
Fuera di e trip pa bloedbank, duna sanger no ta costa bo nada. Kizas e ta tiki ‘scary’ na comienso, pero bo ta custumbra lihe. Tin hende cu hasta gusta e hangua. Ami no ta un di eseynan, pero pa mas cu 10 aña caba sigur cada bes ta un satisfaccion pa por a yuda un biaha mas. Ta wordo bisa tambe cu dunamento di sanger ta yuda bo mes curpa pe traha sanger fresco mas lihe, cu ta bon pa bo mesun salud.
