Parlamentario Dangui Oduber:
ORANJESTAD (AAN) Parlamentario Dangui Oduber a sigui elabora den conferencia di prensa, riba e preocupacion cu tin den seno di Partido y Fraccion di MEP, pa loke ta trata e desaroyonan di Aruba su turismo, durante e lunanan cu AVP-FUTURO ta na mando Gubernamental. E luna di September tabata esun di mas slow di ultimo decada, el a remarca.
“Nos ta papia cu taxistanan. Nan a referi na e luna di September cu enberdad, normalmente, ta un di e lunanan mas slow di aña pero nan a bisa cu September 2025 tabata mas slow sigur den e ultimo decada. Normalmente, un taxista ta warda dos ora pa e haya un ‘ride’ for di aeropuerto, e September aki taxistanan a warda 4 ora. Doñonan di restaurant ta expresa nan preocupacion; nan benta a baha cu 60%, nan mester a manda trahadornan cas”, Oduber ta subraya.
El a agrega cu tambe nan a bisa cu e turistanan cu ta bin come na nan restaurant, un grupo di 4 ta ordena un cuminda pa parti entre nan tur. “Kiermen e preocupacion cu nos tin ta cu no solamente e ‘performance’ sino cu e turistanan di calidad cu nos a custumbra cu ne, ultimo ocho añanan, bao signature di nos gobierno no ta biniendo”, e parlamentario a declara.
El a indica cu den e sector unda cu e grado di ocupacion cay, obviamente menos turista ta bay keda den e hotelnan y menos ta bay sali afo come den e diferente restaurantnan, y consecuentemente, esaki tin repercusion pa cu e trahadornan di hotel. “Nos ta urgi minister Cicilia pa presenta su maneho y su vision, kico ta e accionnan cu ta bay tuma concretamente pa percura pa e grado di ocupacion subi, regula ‘vacation rentals’, percura pa turistanan di calidad yega bek nos pais, pasobra si e situacion, e tendencia sigui manera cu e ta bayendo, sin conta e tourism receipt cu ta e cantidad di placa cu turistanan ta laga atras”, Dangui Oduber a señala.
Fraccion di MEP ta wardando e resultado di Banco Central pa loke ta turismo, pa wak si e placa cu turistanan a laga atras ta mescos cu loke gobierno di MEP a laga na aña 2024 y si no ta asina Aruba ta bibando un situacion alarmante.
