Evelyn Wever-Croes:
ORANJESTAD (AAN): Diabierna, durante un conferencia di prensa extraordinario convoca cu urgencia door di Fraccion di MEP den Parlamento dilanti di Horacio Oduber Hospital, lider di fraccion Evelyn Wever-Croes a expresa su preocupacion pa e impacto cu e crisis financiero di Hospital tin riba pashentnan y personal. Segun Wever-Croes, e situacion a pasa di preocupante pa alarmante.
Wever-Croes a referi na e informacion presenta durante e reunion publico di Parlamento un dia prome. Segun e parlamentario, Parlamento a wordo informa cu 778 persona ta wardando pa un operacion y cu nan operacion no por tuma luga pa motibo di e crisis financiero y e impase entre Hospital y Gobierno di Aruba. El a señala cu, mientras un decision ta keda pendiente, e pashentnan a wordo manda cas pa sigui warda. Hopi di nan mester sigui wanta dolor na cas te ora tin disponibilidad pa opera nan, loke ta afecta nan calidad di bida.
E lider di fraccion a indica cu Parlamento a wordo informa tambe cu 140 persona no por wordo someti na un examen di deteccion di cancer di tripa. Segun Wever-Croes, Hospital no tin e recursonan pa cubri e gastonan di personal pa haci e examennan adicional riba diasabra.
Wever-Croes a yama atencion tambe riba e mal estado di e edificio unda ta brinda e servicio di dialisis. Segun e, si no haya un solucion prome cu fin di aña, Hospital lo por tin cu suspende e servicio pa un grupo grandi di pashent. Segun e parlamentario, esaki por nifica cu algun di e pashentnan afecta lo mester viaha pa Corsou pa ricibi nan tratamento.
Den e mesun conferencia di prensa, Wever-Croes a afirma cu Minister di Salud Publico, Marvin Wyatt-Ras, no kier sigui dialoga cu Hospital, a pesar di e urgencia di e situacion.
Acompaña pa e demas parlamentario di Fraccion di MEP, Wever-Croes a enfatisa cu e fraccion su posicion ta centra riba e interes di pashentnan y trahadonan di Hospital.
E fraccion ta exigi cu pashentnan ricibi e atencion y e respet cu nan merece, y cu Gobierno y Hospital yega na un solucion urgente pa garantisa continuidad di cuido y duna claridad na e personal cu ta sigui cumpli cu su trabao bou di incertidumbre y presion.