Setty Christiaans-Yarzagaray:
*Pasobra e ta mina e derechonan di Parlamento
ORANJESTAD (AAN) – Den conferencia di prensa di fraccion di Partido Movimento Electoral di Pueblo (MEP), Parlamentario Setty Christiaans Yarzagaray, a referi na e reunion (bijeenkomst) mas reciente cu Parlamento tabata tin, cu Prome Minister Evelyn Wever Croes.
Esaki ta e reunion unda cu e dignatario a bay Parlamento pa duna informacion riba e acuerdo mutuo pa bin cu un “onderlinge regeling” cu a reemplaza COHO, y ademas a indica cu Secretario di Estado a cuminza papia caba cu Gobierno tocante RAft, cu ta eigenlijk e cambio di CAft cu Aruba tin, pero mara na un Ley di Reino y e Parlamentarionan no por a duna feedback y su persona ta carga esaki tambe, mescos di banda di fraccion di MEP.
Fraccion di MEP a “haal an” cu na mey aña pasa precisamente nan a entrega preguntanan riba e proyecto di ley di tanto COHO como RAft.
Manera ta bon conoci, COHO ta foi di mesa y aregl'e den forma di un “onderlinge regeling”. Christiaans Yarzagaray a bisa cu mirando e hecho cu no por a mara ningun pais na un ley na un nivel di Reino, y tampoco e contenido di e ley, mescos tambe ta conta e ley di RAft.
El a agrega cu motibo pa cual fraccion di MEP no ta para pa e contenido ta cu bo ta mina e parti cu Aruba tin derecho riba dje pa controla gobierno, primeramente, segun Aruba su Constitucion.
Parlamentario Yarzagaray a comenta cu no tin hopi diferencia, entre locual RAft kier reglamenta cu locual ya e LAft a reglamenta, cual ta e base riba cual CAft ta funciona.
E parlamentario a subraya cu desde 2015, cu tabata tin un mal maneho financiero y Hulanda a bisa cu ta basta di tanto debe, a introduci un CAft. Eigenlijk e base di e ley yama LAFT (Landsverordening Aruba Financieel Toezicht) y e Comision ta CAft, cu ta esun cu a wordo institui pa controla e parti financiero.
El a sigui bisa cu, aworaki, despues di Covid-19 cu a fia 916 miyon florin pa por a pasa door di e pandemia, door di e crisis, cu tur tipo di ayudo na otronan, pero tambe na gobierno mes, Hulanda a condiciona e parti di fianzanan, pasobra e 916 miyon aki no tabata un regalo, sino un financiamento na Pais Aruba, mescos cu e otro islanan y e condicion tabata cu mester mara e financiamento aki na un ley di Reino, como toezicht na e parti financiero.
Christiaans-Yarzagaray a agrega cu na 2018 CAft a perde su base di e normanan unda mester a condiciona kico e pais mester logra. El a bisa cu por a bin un revision riba riba LAft y eyden por a ancra miho pasobra eyden por duna KB tambe.
El a subraya cu fraccion di MEP no por bay di acuerdo cu RAft mara na un ley di Reino, pasobra e ta mina Parlamento su autoridad pa controla gobierno.
