ORANJESTAD (AAN): Parlamentario di Fraccion di MEP, mr. Xiomara Maduro, a haci un serie di pregunta oficial na Minister di Finansa,
Asuntonan Economico y Sector Primario, sr. mr. Geoffrey Wever, relaciona cu un situacion reciente tocante representacion legal di Departamento di Impuesto (DIMP) den corte.
E pregunta ta basa riba un publicacion den prensa di dia 20 di mei 2025, na unda a anuncia cu sr. Murray lo representa DIMP como abogado den un caso legal. Esaki a wordo sigui e mesun anochi pa un declaracion di minister Wever, den cual e mandatario a enfatisa cu e no a duna ningun autorisacion pa e nombra un abogado, y tampoco a trata un peticion pa abogado den Conseho di Minister. Minister a agrega cu awo e lo presenta esaki na e instancia aki. Despues, dia 22 di mei, sr. Murray a informa cu e no lo sigui representa DIMP den corte.
Relaciona cu esaki, fraccion MEP, via parlamentario Maduro, kier haya claridad di parti di minister Wever, riba e siguiente puntonon:
- Si DIMP ta autonomo na e momento cu un caso legal ta surgi contra un inspector di belasting, y si e por busca defensa legal sin envolvi minister y tampoco Conseho di Minister;
- Si tabata necesario pa DIMP haya aprobacion di minister y con esaki a wordo maneha;
- Si minister tabata tin contacto cu sr. Murray y si ta na altura di e motibo dicon e abogado a retira su representacion;
- Si minister ta na altura di e contenido di e caso y si e a trata e tema cu DIMP of cu e abogado;
- Cua ley of procedura ta duna minister e poder pa dicidi ken por defende DIMP, specialmente si DIMP mes tin un otro preferencia;
- Cua ta e rol di minister den un caso manera esaki y si minister tin un base legal pa dicidi ken por representa departamento den corte;
- Si minister a bay cu e decision pa nombra un abogado, na Conseho di Minister cu y ta cual ta e base legal cu exigi esey;
- Ken tabata presente den e reunion di Conseho di Minister ora e informacion di e caso y/o escogencia di abogado a wordo comparti;
- Y finalmente, kico a wordo discuti den Conseho di Minister tocante e caso aki, y cua tabata e conclusion of informacion relevante cu a sali for di esey.
Fraccion di MEP ta expresa cu ta importante pa tin transparencia y bon gobernacion den asuntonan gubernamental, specialmente ora ta trata uso di fondo publico y maneho autonomo di entidadnan estatal. Fraccion MEP ta sigui pone enfasis riba importancia di transparencia, responsabilidad y respet pa e marco legal den tur accion gubernamental. Nos ta keda pendiente pa contesta di Minister Wever.
