ORANJESTAD (AAN): Fraccion di MEP a presenta preguntanan na Minister di Finansa tocante e manera con a maneha e evaluacion fiscal di e candidato pa bira minister sr. Mike de Meza.
E motibo pa e preguntanan aki ta e señalnan preocupante di presion politico y di media cu supuestamente a wordo eherce riba Departamento di Impuesto y otro instancianan.
Segun e informacion cu e fraccion tin, e candidato no ta cumpli aparentemente cu tur rekisito pa por bira minister. Entre otro Departamento di Impuesto (DIMP) lo a duna un opinion negativo tocante su comportacion fiscal. Loke a resalta ta cu e candidato – hunto cu dos miembro di prensa – a eherce un presion grandi riba DIMP y Gobierno. Segun algun fuente, e tactica uza ta parce di ta intimidante y ta yega cerca di practica mafioso.
Ni Minister President ni Minister di Finansa no a tuma accion pa stop e situacion. DIMP a tuma e paso pa contrata un abogado externo, pero e abogado ey a retira su mes despues di solamente dos dia. Ta kere cu e desicion aki tin di haber cu presion indebido den e caso aki.
“Si esaki ta berdad, nos ta drenta un tereno peligroso, caminda integridad di nos institucion ta wordo comprometi. Departamento di Impuesto mester por traha sin ningun tipo di presion politico of personal. No ta aceptabel si funcionarionan di gobierno ta wordo intimida of experto externo ta sinti obliga pa retira. Nos mester para firme pa proteha nos estado di derecho.”
Den e preguntanan, e Fraccion kier sa si e minister a tuma contacto cu DIMP tocante e caso, si el a tuma contacto cu e abogado, y ki medida e ta tuma pa salbaguardia e integridad di Departamento di Impuesto. E minister tin 2 siman pa duna respuesta por escrito riba e preguntanan aki.
