Parlamentario Evelyn Wever-Croes:
- A trata e tema di Rijkswet (HOFA)
- Sindicatonan no tabata tin ningun informacion
ORANJESTAD (AAN) Parlamentario, señora Evelyn Wever-Croes, di fraccion di Partido Movimento Electoral di Pueblo (MEP), a duna di conoce cu Fraccion di MEP a invita e Sindicatonan cu ta representa empleadonan di sector publico pa un reunion, pa trata e tema di Rijkswet HOFA.
E parlamentario a expresa cu ta importante pa tur hende tin informacion p’asina tur ta alerta pa sa kico ta bay sosode. “Mi mester bisa cu e tabata un hopi bon reunion; mi ta gradici sindicatonan pa a acepta nos invitacion aki na Parlamento cu Fraccion di MEP y mi mester conclui si, cu nan no tabata tin informacion. Un sindicato a download e documentonan, e otronan no a haya esakinan, kiermen, nos a priminti cu nan ta bay haya tur documento di nos, kiermen e Leynan, e Memorie van Toelichting, e Timeline, e Historia, pues tur documento pa nan ta bon informa”, Parlamentario Wever-Croes a relata.
“Y mi mester bisa tambe cu mi ta conclui cu no ta solamente Parlamento gobierno no a informa, no ta solamente tras di lomba di Parlamento gobierno a bay y yega na un acuerdo cu Hulanda. No! Nan a bay tras di lomba di sindicato. Sindicatonan no a wordo envolvi, y mi ta corda tempo cu mi tabata Minister President, prome cu un paso asina grandi nos tabata tene nos Cumbrenan cu Sindicatonan, gremionan comercial, y cu politiconan aki na Aruba”, e Parlamentario a señala.
Wever-Croes a expresa cu e ta lamenta cu e sindicatonan no a wordo envolvi, pero e ta hopi contento cu e reunion; e tabata hopi positivo, nan a comparti informacion y asin’aki mas y mas informacion ta yega na esnan concerni.
