Hendrik Tevreden (MEP):
ORANJESTAD (AAN): Bida ta un coleccion di experiencianan, nan frecuencia y nan intensidad. E experiencia pandemico aki tabata uno intensivo. Laga nos spera cu e no lo ta frecuente. Durante tratamento di e reunion di e ley di FASE den parlamento a bini dilanti cu ta tin falta di control, na otorgacion di fase na pueblo y cu tin algun cos cu a cana robes.
Nos ta sali splica cu enberdad tabata tin algun cos cu a bay robes, manera hende nan cu a fayece di Covid ora tabata haya fase, y nan famia a ricibi algun pago mas despues di esey. Tin algun hende cu a haya pago dobel un o mas luna. Y otronan cu a purba na abusa di e sistema y hasta algun cu no a haya ayudo di fase, segun Contraloria General.
E conclusion ta cu como tabata falta mas control, e riesgo lo a existi pa fraude y corupcion. Pero e realidad ta cu tabata un situacion di emergencia cu ta tin un impacto grandi riba nos pais. Gobierno mester a trece un ayudo den un tempo cortico, bou di un presion enorme y cu poco empleado. Basta famianan a keda sin entrada.
Tabata reina un panico tremendo tanto medico y financiero. Pesey IMF - article 4 - ta haci conoci cu gobierno di Aruba a actua liher y esey a scapa economia di nos pais y a salba bida di hende. Elogiando asina e pasonan cu a worde tuma den e pandemia pa gobierno.
Pesey nos ta di opinion cu fase tabata un ayudo pa hopi hende nos comunidad durante e crisis. Pero ban back un rato. 13 di maart e prome dos casonan di covid 19 a worde diagnostica na Aruba. E panico di loke cu nos tabata mira riba TV internacional a yega cerca. E prome scolnan a sera y algun hende ya caba a worde manda cas di trabao. 16 di maart a sera tur otro scolnan, pero tambe a sera frontera di Aruba cu tur otro pais. 19 di maart a pone toque de queda y shelter in place. Y e demas retironan a cay y pa mei fase a start. Los di esaki tambe ta tin e reto grandi pa mantene e orden publico, pesey a introduci toque de queda pa ehecuta y controla e asunto y plamamento di e covid.
Economia di nos pais a cay den otro, finanzas publico no tabata conoce un buffer financiero como cu, e debe nacional tabata hopi halto. Un calculacion di 24 mil hende sin trabao, economia familiar a conoce un caos, mester a introduci pakete di cuminda, amplia e lista di onderstand y hasta algun hende yudanan cu shelter. Bou e circumstancianan aki gobierno mester a actua siendo cu esnan cu tin e capacidad huridico tecnico tabata ocupa cu Raft y cu Coho.
Fase a concentra pa yuda miles di hende entre otro taxi chauffeur, busnan chikito, y hoteleronan principalmente cu hotel a manda cas. Un ayudo cu a yega rapido y cu no a warda riba e cuadro di ley den e crisis pa ehecuta esaki. Pesey awe cu a verifica den sala tur e puntonan nos a pasa e ley y finalisa e proceso aki. E realidad ta cu e a tarda pero awor e ley tey. Nos tur tabata kier pa e ley a bin mas liher, pero circumstancianan menciona a pone cu esaki a tarda.
