Parlamentario Evelyn Wever-Croes
- Fraccion di MEP a manda carta pa Prome Minister
ORANJESTAD (AAN): Parlamentario Evelyn Wever-Croes, den conferencia di prensa di Fraccion di MEP den Parlamento a duna di conoce cu Fraccion di MEP a manda un carta cu 25 pregunta pa Prome Minister Mike Eman. Den e carta aki, Parlamentario Wever-Croes a puntra Eman si ta berdad cu Gobierno di Aruba a tuma e decision pa no nombra un minister plenipotenciario mas na Hulanda y si ta asina, ki dia e decision aki a wordo tuma. E Parlamentario a haci un peticion tambe na Prome Minister Eman pa manda un copia di e peticion.
Parlamentario Wever-Croes a remarca e hecho cu Minister Gerlien Croes y Prome Minister Mike Eman no ta riba mesun linea pa loke ta trata e tema di minister plenipotenciario na Hulanda. Minister Croes a indica cu lo no tin un minister plenipotenciario mas pa motibo di e costo halto. Despues di algun dia di e exprecionnan haci pa Minister Croes, Prome Minister Eman a indica cu e motibo cu no ta manda un representante Hulanda, no ta pasobra e lo costa hopi placa.
Segun Parlamentario Croes, e decision aki ta un decision totalmente desconoci pa Fraccion di MEP pa motibo cu no a ricibi informacion di esaki. “E falta di transparencia riba e tema aki di parti di Gobierno di Aruba ta increibelmente grandi y ta stroba nos di Parlamento di haci nos trabou. P’esey mi a manda un carta pa Prome Minister”, Parlamentario Croes a expresa.
Den e carta, a puntra Prome Minister tambe si tin conseho riba e decision aki di entre otro Directie Wetgeving y Raad van Advies. Un conseho sigur cu sa di dje, segun Wever-Croes, ta esun di Raad van State, cu ta e organo di mas halto na Hulanda, cu a indica cu ta importante pa tin un minister plenipotenciario na Hulanda pasobra e representacion di Aruba na Hulanda mester haya un base mas firme y structural. Y recientemente Profesor Veenendaal tambe ta bisa mesun cos.
Un otro pregunta cu a haci Prome Minister Eman, ta con gobierno lo acapara e falta di un minister plenipotenciario na Hulanda, siendo cu su trabou no ta solamente pa asisti na Conseho di Minister un biaha pa luna. “Esey ta lo minimo y no por keda manda Minister Gerlien Croes tur luna Hulanda pa 3 dia cu no lo yuda pa nada. E representacion mester ta structura y firme na Hulanda pa haci tur e trabounan cu mester haci entre reunionnan di Conseho di Minister”, Parlamentario Evelyn Wever-Croes a duna di conoce.
