Tocante Ley di Reino HOFA:
- Pueblo lo por haya sa ken tin razon
- Asina berdad lo bin riba mesa
ORANJESTAD (AAN) Den e conferencia di prensa yama pa Fraccion di MEP tocante e Rijkswet y e conseho cu el a relata caba, cu e fraccion a ricibi di Professor Elzinga al respecto, Parlamentario Evelyn Wever-Croes a elabora tocante e debate na cual el a reta Prome Minister Eman, y cu te ainda e no a tende nada di dje. Esaki ta e punto 3 y final, cu Wever-Croes a trece dilanti den e rueda di prensa.
Dia 20 di September, pues mas cu tres siman pasa, cu Parlamentario Wever-Croes a reta señor Eman pa debati riba e Ley di Reino HOFA.
“Un debate pa nos papia tocante ken a firma kico. Pasobra mi a firma un documento di tres pagina, el a firma un documento di 46 pagina. Un debate den cual cada un por bin cu nos pruebanan y mustra Aruba henter ken a firma kico. Pakico un debate? Pasobra tin hende ta puntra mi pakico reta Prome Minister na un debate, si ta Parlamentario mi ta, y den Parlamento un debate mester tuma lugar, y e ta berdad. Pero pakico e motibo di e debate ta simplemente pa e berdad bin riba mesa. Pasobra si bo weita bon, di parti di Gobierno nan no ta dunando ningun informacion, y mi ta puntra abo como ciudadano siguiendo e conferencia di prensa aki, abo ta merece algo corecto. Riba e Ley di Reino, dia 29 di Augustus, nan a bin Parlamento bisa ‘Tende nos a caba di firma un acuerdo cu Conseho di Minister di Reino, riba e Ley di Reino akinan caba’. Despues di esey, nan no a duna informacion. Algun siman pasa nos a weita cu Minster Gerlien Croes a bay papia na Enfoke, despues nos a weita cu Minister Geoffrey Wever a duna entrevista cerca Juancho Werleman na Top FM, y despues nos a weita cu señor Mike Eman, riba den un face somewhere a duna un declaracion. Esey ta loke nan a haci! Nada mas. Y den ningun di e tres combersacionnan ey cu nan tabata tin, no a duna realmente informacion al caso. Minister Gerlein Croes a bay mas pa tira culpa riba MEP, y bo no por tum’e na malo pasobra e no ta domina e materia. Kiermen, e no por defende esaki. Mita di loke el a bisa no ta ni corecto tampoco. Minister Geoffrey Wever, unico cos cu e por a bisa ta ‘ami ta haya esaki bon si mi ta haya placa’ pero den bida bo tin cu weita ora bo ta bay haya placa, kico ta locual bo ta sacrifica a cambio. Norma y balornan aki na Aruba, ta di tal manera cu bo no ta yega haci tur cos, pa placa. Placa no ta tur cos den bida. Na e momento aki Aruba tin un modelo economico y un modelo financiero cu ta funciona, y bo kier bay acepta otro modelo den e Ley di Reino cu ta proba cu a frena Curacao cu Sint Maarten pa crece economicamente, djis pa haya un saco di placa? Laga nos bisa cu bo no ta teniendo cuenta cu tur aspecto di nos economia, ni tampoco di e exito cu Aruba tin. Y kico mi por bisa di señor Eman su entrevista? Esey ta tira culpa riba Evelyn, Evelyn Wever-Croes a firma…esey ta unico cos cu e por a bisa, y p’esey nos a bin tambe cu e conseho huridico, cu tambe ta mustra cu locual cu nos a firma tabata pa bay mesa y no tabata mara ni gobierno y sigur no Parlamento. Ora un Parlamentario bisa bo: ‘nos ta mara na dje’ bisa e Parlamentario bay busca miho informacion. Pero si gobiernonan mes a yega na un acuerdo cu otro, hamas di la bida esey por mara un gobierno. Pues e debate ta pa e berdad bin riba mesa y pa esun responsabel di lidera e pais aki, señor Eman, carga su responsabilidad!” Ta palabranan textual di Parlamentario y lider di fraccion di MEP, Evelyn Wever-Croes.
