ORANJESTAD (AAN) -- Partido Movimento Electoral di Pueblo (MEP), tabata tin cita cu e Informadornan, Diamars mainta.
Señora Evelyn Wever-Croes, lider di Partido MEP y Minister Presidente Demisionario, hunto cu Hendrik Tevreden, presidente di e partido, a atende cu e reunion aki. Despues señora Wever-Croes a informa prensa tocante esaki.
E dignatario a comenta cu e reunion aki a tarda un ora, y e tabata un bon encuentro, den cual a intercambia varios idea. Wever-Croes a subraya, cu naturalmente, e contenido ta confidencial, no obstante, el a menciona cu di parti di Partido MEP nan a trece dilanti, cu pa nan ta hopi importante tin stabilidad na e momentonan aki. “Nos ta buscando un partner cu ta ofrece nos e stabilidad aki”, e dama a señala.
Nos ta interpreta e decision di pueblo dia 25 di Juni, pa MEP continua den Gobierno; nos a confirma nos forza, nos a confirma nos votonan pa MEP ta esun cu ta guia e gobierno, cu un otro partner den coalicion, y esey ta locual nos a trece padilanti”, Lider di Partido MEP a remarca.
El a agrega cu tambe nan a trece padilanti e temanan mas importante cu pa Partido MEP, mester haya atencion den e tempo nos dilanti, cu e siguiente gobierno.
“Pa nos di MEP ta e recuperacion economico di nos pais, pa crea cupo di empleo, pa asina tur hende cu a perde empleo durante e pandemia, por haya nan trabao bek, mira e desaroyo di nos pais. Nos ta riba e bon caminda caba, pero ainda falta, manera nan ta bisa.
“ E otro parti ta e recuperacion di e ser humano tambe, y aki nos ta referi na e trankilidad di e salud mental, cu ta aspectonan cu mester di atencion”, e dignatario a splica.
El a agrega cu e Landspakket ta keda un tema hopi importante. “Kiermen, pa nos ta alinea den e gobernacion pa cu esaki, esey tambe tur hende por a mira den e instruccion di Gobernador. Esey ta loke nos a papia mas tanto durante e ultimo ora aki”, Evelyn Wever-Croes, lider di Partido MEP, a duna di conoce.
