ORANJESTAD (AAN): Parlamentario mr. Edgard Vrolijk (MEP) ta indica cu enseñansa den e proximo gobernacion mester ta un prioridad.
Den cuadro di desaroyo di un pais pero sigur despues di e pandemia di Covid-19, enseñansa ta di vital importancia den recuperacion di nos dushi isla Aruba.
Ta esencial cu enseñansa mester ofrece tur hende espacio pa nan por desaroya tur nan conocemento, habilidad y actitud cu nan mester pa nan por funciona bon y logra di ta exitoso den nan bida.
Percura pa stabilidad den enseñansa
Prome reto ta pa trece trankilidad y confiansa den enseñansa. Despues di casi 4 aña di un maneho cu a crea mas instabilidad pa motibo di cambionan cu e actornan mes no tabata na altura y sigur hopi di e cambionan haci no tabata por ser argumenta y mas pio no tabata involucra esnan cu mester traha cu cambionan aki pa nan tambe duna nan parti p’asina e cambionan por ser carga, pero sigur por ta un exito tambe.
Pa por garantisa e trankilidad pero sigur pa crea confiansa bek den educacion mester por inventarisa tur e cambionan haci. E cambionan cu ta bon ta sigui cu esakinan y sigur tur cambio cu no por argumenta y sigur yena cu duda mester ser para di biaha y sigur tuma e tempo necesario pa haci adaptacion hunto cu esnan cu mester traha cu e cambionan pa por tin draagvlak y nan contribucion profesional den esaki.
Plataforma di dialogo
Nos tur ta conciente cu mester bin hopi cambio pa locual ta entre otro curiculo, manera di duna les unda cu mester bay inverti hopi den locual ta upgrading di maestro cu no a tuma lugar manera debe di ser ultimo añanan. Pero pa por logra cu e cambionan cu mester ser haci, ta hopi importante pa usa e plataforma di dialogo.
Pues ta di sumo importancia pa por involucra nos docentenan pa nan por duna nan contribucion p’asina e cambionan por ta exitoso.
Educacion pa adulto mester ser reenforsa
Covid a siña nos cu educacion pa adulto mester ser reenforsa y sigur mester traha conhuntamente cu nesecidad den mercado laboral. Den bista di Covid hopi hende a perde trabao of ta hayanan obliga di eherce otro funcion cu nan no ta prepare pe, ta haci mas cu necesario pa percura reenforsa om-, her y bijscholing y asina nos hendenan por drenta mercado laboral mas eficiente. Y asina nos indice di desempleo ta keda abao y sigur unda nos yuinan di tera tin e oportunidad di por haya trabao riba e mercado laboral.
Innovacion den Enseñansa
Ta di primordial importancia pa sigui e proyecto di innovacion den enseñansa unda cu esaki lo trece hopi cambio den e manera di duna les unda esaki lo ta uno atractivo pero sigur mas cerca di nos muchanan. Den e proceso aki no ta solamente importante pa ekipa scolnan cu equiponan innovativo pero mester percura pa upgrading di nos maestronan p’esaki por ta un exito rotundo y no manera cu ela ser implementa di hinsa pega borchinan digital pero sin prepara e maestronan manera debe di ser mientras cu ta nan ta e actornan di mas importante den enseñansa.
Pa nos por implementa cambionan den enseñansa ta di sumo importancia pa na prome lugar trece stabilidad, trankilidad y confiansa den enseñansa y percura pa ta den dialogo cu nos maestronan pa nan forma parti den e proceso di calke cambio na bienestar di enseñansa.
