Parlamentario Eduard Pieters:
ORANJESTAD (AAN): Bo no por cambia e regla di e wega mientras e wega mes ainda no ta cla. Segun lider di fraccion di PPA, Eduard Pieters, esaki ta exactamente loke Gobierno ta haciendo cu e reciente cambionan publica riba un website di FUTURO den e sistema di scolnan publico pa promociona mas inclusion den scolnan basico.
Durante e conferencia di prensa semanal, parlamentario Pieters a enfatisa cu fraccion di PPA no ta contra e reforma pa por tin mas inclusion den enseñansa publico. Al contrario, e partido ta sostene un sistema di enseñansa cu ta mas inclusivo y cu ta tene cuenta cu e diferente necesidadnan di cada mucha. Pero, segun Pieters, Gobierno ta actua net robes.
-Bo no por cambia evaluacion sin prepara enseñansa
Pieters a expresa su preocupacion unda cu Ministerio di Enseñansa a anuncia e cambionan den e “bevorderingsnormen” pa enseñansa basico di e scolnan publico, mientras hopi di e condicionnan necesario pa haci e reforma un exito, ainda no ta cla y mucho menos conoci pa e actornan principal, esta e maestronan, cu ta esunnan cu mester ehecuta e cambionan.
Segun e parlamentario, e “Kerndoelen” di Aruba ainda no ta completamente implementa. Enseñansa ainda ta funciona principalmente den materia separa, mientras e vision nobo ta basa riba area di aprendizahe holistico, personalisa y pa empodera tur actor den enseñansa.
“Con bo ta para e manera actual di evalua un mucha, si ainda bo no a cambia e manera di siñ’e?” Pa PPA, e secuencia ta importante. Prome bo ta construi e fundeshi, dus percura pa sostene e maestronan, guia e implementacion adecua den e scolnan y despues bo ta cambia e sistema di “bevorderingsnormen”.
-Inclusion ta pidi preparacion, no solamente bon intencion
Pieters a bisa cu e intencion di crea un sistema di evaluacion mas inclusivo pa e muchanan cu diferente necesidad di aprendizahe sigur merece apoyo. Pero bon intencion so no ta basta.
Segun Pieters, e maestro mester haya training den evaluacion formativo, strategia di duna feedback, instruccion efectivo y e metodo pedagogico necesario pa guia cada mucha segun su propio desaroyo.
“Bo no por bisa un maestro awe cu mañan e mester traha completamente diferente, sin dun’e e hermentnan necesario pa logra esey.”
Pa Pieters, e exito di cualkier reforma educativo ta depende di e maestro, cu ta esun cu mester eherce den practica tur dia.
Reforma ta midi den e maestro, no den e documento, cu niun hende sa di dje ainda. Pa Eduard Pieters, e cuestion principal no ta si Gobierno kier cambia enseñansa. Ta si Gobierno ta preparando enseñansa pa e cambio.
Paso un reforma educativo no ta bira un exito door di djis cambia un reglamento. E ta bira un exito, ora bo inverti den e maestro, prepara e scol y pone e mucha central den cada decision. Esey, segun PPA, ta e unico caminda pa construi un sistema educativo cu realmente ta prepara futuro generacion di Aruba.
