ORANJESTAD (AAN) – Diaranzon mainta a tuma lugar e conferencia di prensa di fraccion di MEP, den cual Parlamentario Endy Croes
a elabora tocante e programa di accion di Partido Movimento Electoral di Pueblo, pa e periodo 2021-2025 y ta hiba como nomber: “Reposicionando e rumbo di nos pais”.
“E programa aki desde siman pasa, tambe riba website di MEP: mep.aw, pa esnan cu kier siguie. Croes a bisa cu e ta un programa extenso (120 pagina) unda tur parlamentario y candidato hunto cu nan expertonan a trahe, for di momento cu gobierno a bira demisionario. Den dje por lesa tocante tur loke gobierno a haci, su logronan y kico ta e plannan y vision pa e proximo cuater añanan, saliendo poco, poco for di e pandemia” segun Parlamentario Endy Croes.
E parlamentario a enfoca riba un punto specifico cual ta e Master Plan cu Gobierno a formula, y cu ta titula: “Reposicionando e rumbo di nos pais”.
“Gobierno a inicia e proceso di planificacion pa Aruba por sali mas fuerte di e pandemia cu a pone mundo henter para keto un rato, y e ta un documento diseña cu un estrategia pa por tuma y implementa decisionnan rapido” Croes a splica.
Ta trata aki di un planificacion den tres aña, manera ta stipula den e programa.
ACCIONNAN DI PRIORIDAD:
Parlamentario Endy Croes a sigui splica cu e accionnan di prioridad ta pa establece condicionnan fundamental pa Aruba su economia, na termino largo, mientras ta logra beneficionan na corto plazo y mesora.
“E acuerdo cu Aruba a firma cu Hulanda, esta e Landspakketnan, na momento cu a traha e Master Plan aki, nos a tuma nota tambe cu esaki ta alinea cu otro den gran parti. Y a mantene e estructura aki tambe, concluyendo e Master Plan pa henter Aruba”, Endy Croes a indica.
El a agrega cu e ultimo dos decadanan, cantidad di estudio a wordo haci tanto pa sector publico, como tambe pa e stakeholders di sector priva.
“Al respecto, e desafionan cu nos economia ta enfrentando y kico nos mester bay haci como isla chikito. No solamente esey, nos tin e rating di agencianan internacional manera IMF, International Monetary Fund y tambe Banco Mundial, a efectua estudionan cu a señala e mesun desafionan aki, al respecto di e economia di Aruba den e ultimo decadanan”, e parlamentario a señala.
Banda di esaki ora cu e pandemia a dal henter mundo y cu Aruba a sufri inmensamente di esaki, na momento cu a cera hotelnan, aeropuerto, etc., Gobierno tabata conciente kico e dolornan aki ta.
“Pero na mesun momento Economische Bureau Amsterdam, na Mei 2020, a traha un rapport pa Tweede Kamer cu a wordo trata aya na Hulanda, bao di e nomber ‘Kleine eilanden grote uitdagingen’ cual tambe a refleha e mesun desafionan pa cu nos economia. Tabata conoci caba, di tanto rapport y estudionan di IMF, Banco Mundial, Economische Bureau Amsterdam, unda diferente experto ta refleha riba e mesun puntonan di atencion, como cu e economia di Aruba ta hopi chikito”, Parlamentario Endy Croes a indica.
Den otro articulo lo por lesa mas di e relato aki di Endy Croes di fraccion di MEP.
