_large.jpg)
Otmar Oduber di partido PPA
ORANJESTAD (AAN): Otmar Oduber, lider di Partido PPA ta indica cu costo di bida ta haltisimo na e momentonan aki y mester haya e atencion necesario. E ta un di e tres partinan central den e plan a largo plaso di PPA, Nos Aruba 2025-2050.
Lider di PPA, Otmar Oduber a elabora riba e parti aki unda el a duna un ehempel hopi recien y cu tin efecto grandi riba nos comunidad.
E siman aki un otro impuesto di banco a wordo anuncia y PPA lo bay atende cu e parti bancario. Den nan plan ta bisa claramente cu e monopolio di banconan na Aruba tin cu yega na un fin, hunto cu Banco Central lo crea e instrumentonan necesario pa por habri competencia, habri porta pa banconan por competi, pasobra e meta ta pa e ciudadano cu kier habri un cuenta por haya e miho servicio y e miho tarifanan. Tambe tur comerciante cu ta haci negoshi na Aruba pa ley lo por tin un cuenta na banco, ningun ciudadano lo por wordo nenga di tin un cuenta di banco si tur instancia na Aruba, incluyendo gobierno, ta exigi pa no paga cash.
Tambe PPA relaciona cu costo di bida ta bisa cu nan ta para pa un reforma. A bisa categoricamente cu lo elimina BBO y lo bin cu un BTW na grens cu ta bay pone cu e sistema di cobra di gobierno ta mas husto, mas igual pa tur hende y no ta scapa ningun hende. Pero, na mes momento mester percura pa reduci e impuestonan pa loke ta loonbelasting, elimina inkomstenbelasting,y reduci winstbelasting, pa pueblo tin mas placa den su cartera.
Esaki combina cu e reduccion di gastonan di gobierno cu 12% cu ta un averahe di 140 miyon Florin den goederen en diensten cu mester percura cu den e prome 4 añanan, den e plan di 25 aña, ta wordo reduci. E placa ey ta bay wordo inverti, entre otro, den nos pensionadonan pa duna remedi bek, pa duna AZV y SVB e espacio necesario pa por cumpli sin cu tin cu bin cu medida, sin cu tin cu bay fia placa y sin cu tin cu mishi cu e fondonan di reserva na e momentonan aki.
Fin di siman aki Plan Nos Aruba 2025-2050 lo ta disponibel riba tur plataforma di PPA.
