ORANJESTAD (AAN) – E lider di Partido MAS, Marisol Lopez-Tromp, na salida di su audiencia cu Gobernador, a duna prensa un declaracion.
Lopez-Tromp a expresa cu ta sinti su mes hopi orguyoso, satisfecho, contento y gradici na tur e votadornan cu a deposita nan confianza den Partido MAS, su candidatonan y particularmente e resultado personal cual cantidad di voto ta 4.191 voto, cu pa su persona ta un adelanto grandi y un gran sosten pa e partido cu e ta lidera.
Lopez-Tromp a comenta cu den audiencia cu Gobernador, nan tabata tin un combersacion tocante e resultado di eleccion. El a subraya cu pa MAS, e cantidad di votonan ricibi sigur ta un señal cu pueblo kier un cambio. Nan ta votonan no tradicional unda e partido a crece. El a bisa cu cinco partido tin cu a haya asiento, y e partidonan tradicional cada un a bay atras, y e partidonan chikito, si por yame asina, cada un a bay dilanti.
MAS a bay dilanti grandemente, y pueblo a duna nan un señal di dos asiento, den un tempo asina cortico, cu e ta considera insolito pasobra e partido a wordo traspasa dia 22 di April, y den dos siman a traha e lista di candidato. Hopi hende y prensa a puntre pakico un lista di siete candidato so, y para dilanti di Gabinete di Gobenador el a bisa cu no ta bay pa e cantidad sino pa e calidad. Tampoco nan a traha cu material pasobra nan a tende cuenta cu tin un pandemia ainda. Pues un campaña diferente cu e mensahe di e partido, y hopi hende a bisa cu MAS tabata keto, pero nan tabata trahando duro.
Lopez- Tromp a señala cu e tempo nos dilanti tin hopi decision cu mester wordo tuma, cu ta mara na, por ehemplo e Landspakket, y esaki ta bay conta pa tur partido.
