Evelyn Wever-Croes:
*Un gobierno cu no ta tuma decision, pero ta laga otro dicidi pa nan
ORANJESTAD (AAN): E decision di Corte awe den e caso di e ceramento di e caminda di tera na nos costa norte ta mustra, un biaha mas, e resultado di 500 dia di un gobierno AVP-Futuro cu ta falta accion, liderazgo y decision.
En bes di cu e gobierno tuma responsabilidad y busca un solucion cu ta balansa proteccion di nos naturalesa cu e interesnan di nos comunidad y e sector turistico, awor ta Corte ta obliga gobierno pa sinta na mesa cu ABC y e touroperators pa busca un solucion rasonabel y practico.
Corte a duna gobierno un tempo di 5 siman, te 15 di oktober 2026, pero bou di e condicion cu gobierno den e proximo siman determina un fecha y ora pa sinta, y si ta necesario mas cu un biaha, cu ABC – e partido cu a inicia e caso – y e touroperatornan pa yega na un solucion. E juez ta laga bon cla cu gobierno mester tuma e iniciativa - eigenlijk nan mester a tume caba prome cu cera e caminda cu baranca - y cu tur partido mester tira awa den biña pa un acuerdo por logra.
Esaki ta wordo considera un “brevet van onvermogen” pa e gobierno. Despues di 500 dia den gobierno, ainda AVP y Futuro no tin un solucion, siendo cu nan a haya tur documento di ex Minister Ursell Arends durante e traspaso. Peor ainda: e gobierno no ta tuma ningun decision mes, pero ta prefera pa un hues dicidi ki ora y con nan mester sinta na mesa. Esaki ta berguensa!
E pregunta ta simpel: pa kico nos tin un gobierno si e gobierno no ta goberna?
Aruba mester un gobierno cu ta tuma responsabilidad, cu ta actua y cu ta busca solucion, no un gobierno cu ta warda te ora un hues obliga nan pa haci loke nan mes mester a haci desde prome
dia.
E 500 dia di gobierno AVP-Futuro ta e prijs di un gobierno cu no ta tuma decision ni accion, pero ta prefera pa otro dicidi pa nan.
Wever-Croes a finalisa bisando: “Nos por haci miho. Cambio ta e decision pa tuma responsabilidad, pa actua y pa pone Aruba prome.”
