Otmar Oduber PPA:
ORANJESTAD (AAN): Aruba ta para den un momento decisivo: scoge pa placa of pa principio. Gobierno actual, sostene pa FUTURO, ya caba a indica bon cla desde eleccion, cu nan ta dispuesto pa firma e Rijkswet unda cu ta, djis pa haya mas placa. Esaki ta un muestra cla di ken ta para pa materialismo y ken ta para pa idealismo. Pero gobierno ta keda opta pa sconde e discusion crucial riba nos autonomia for di pueblo y ta laga pueblo keda den scuridad. Mas e gobierno evita di discuti riba e tema, mas facil ta pa nan pasa un acuerdo cu, riba termino largo lo costa nos hopi mas cu e supuesto beneficio financiero. Aki no ta solamente cuanto nos lo paga na interes, sino ta ken realmente lo bay determina e direccion na Aruba.
Materialismo Riba Idealismo
E strategia di gobierno y sigur di FUTURO ta cla y raspa: placa prome, autonomia despues, si acaso algo di autonomia keda. A pesar di peticion di PPA, ta keda manipula cu e tema di Rijkswet, pa evita discusion amplio den Parlamento. E falta di transparencia no ta un accidente; ta un strategia pa lanta un “exito” financiero riba un costo politico y cambio inmenso di nos historia. “For di eleccion caba FUTURO a bisa cu nan ta por y ta pa firma, unda cu ta pa haya e Rijkswet aki, paso ta placa nan kier!” Otmar a enfatisa. E reduccion di interes ta bunita presenta como un logro, pero patras di dje, tin e entrega di poder decisivo na Den Haag. “Nan ta bay e pueblo e 6 pa 9, pasa unabes nan bin den Parlamento, ta pa nan bisa cu awor nan tin placa pa drecha aki aya, anto na caminda esaki ta bay costa nos hopi mas, paso a entrega bo idealismo,” Oduber a subraya. Pues finalmente loke bo gana na un banda, bo ta perde na e otro, y esaki ta un trade-off cu pueblo no a autorisa y ni sa di dje.
Historia cu mester sirbi como les y fundeshi
Autonomia di Aruba no a cay for di shelo; a tuma decadanan di lucha. “Esunnan cu a biba loke Aruba a biba den e tempo di Antias y den tempo di colonialism, ta compronde dicon e lucha aki a cuminsa den e añanan 40. Pakico y con a concretis’e na cierto momento na Ronde Tafel Conferentie, unda hende a uni cabes. Ora tabata entrega mocionnan den pasado, tabata den presencia di e lidernan di e generacionnan ey; Juancho Irausquin, Henny Eman, Shon A. Eman y Betico Croes. No ta pornada Betico Croes a pone e dos potretnan band’i dje,” tabata expresion di Otmar. E acto di Betico Croes tabata pa reconoce e lucha di tur lider, for di e añanan 40 te ora cu Aruba a logra na 1985 y cu por a drenta su era di Status Aparte na 1986.
Cuchio na garganta den un pandemia
Pandemia di COVID-19 a mustra cu Den Haag no ta duna nada sin condicion, hasta den e momento di un crisis mundial. Nos no por lubida, cu ora Aruba tabata den crisis di pandemia, Hulanda a pone cuchio na garganta di e Prome Minister di e tempo ey: firma pa e Rijkswet, of no tin 60 miyon pa paga salario, hospital y servicio esencial. Segun Otmar: “No ta pa defende e Prome Minister di e tempo, pero esaki ta un realidad: meymey di pandemia tabatin un abuso di marca mayor cu a tuma lugar y no kere cu ningun momento un Hulandes ta bay duna bo algo pornada!”
Finalmente e reduccion di interes di 16-17 miyon florin pa aña no ta bin pornada. Ta Corsou so a haya 4.6 miyon di florin y Aruba mes no a haya nada! “Y si e Hulandesnan ta hacie awe, ta paso tin algo den e rabo di colebra ey. E veneno ey, ta hinca bo den un Rijkswet y nunca mas bo ta sali di dje!” Otmar a finalisa bisando.
