Leonardo Figaroa a introduci Partido PDP na prensa:
ORANJESTAD (AAN) – Manera ta conoci Aruba ta conoce un partido politico nobo, esta Partido Direccion Politiea (PDP), lidera pa e hoben Leonardo Rafael Figaroa, ken a convoca su prome rueda di prensa durante siman cu a pasa.
Figaroa ta un hoben di 22 aña di edad, studiante di Derecho na Universidad di Aruba, y den e conferencia di prensa aki el a enfoca riba Derechonan di Mucha, participacion di nos hobennan y tambe e tema delicado di abuso sexual di mucha.
El a expresa cu pa su persona ta un honor di a realiza su prome rueda di prensa como politico. El a comenta cu recientemente, e tabata den un noticiero den cual el a presenta un tiki di PDP su ideanan di con di con nos muchanan mester haya un tiki mas proteccion.
Inspira den e palabra “politiea” el a dicidi di convoca e rueda di prensa cu e monumento di Anne Frank su tras, cual tin un nificacion importante pa e hoben y su partido, pasobra e ta un simbolo di mucha, di inocencia, di perseverancia y determinacion; y di e falta di atencion pa locual ta e proteccion cu na Aruba ta wordo brinda na nos muchanan. Asina Figaroa a señala.
Figaroa a sigui bisa: “Na Aruba nos tin un Tratado cu ta conta pa tur mucha di 0 pa 18 aña, y importante pa Aruba ta cu awe nos ta 22 aña leu for di un Tratado di Derechonan Internacional y tin otro protocolnan cu a keda sin a wordo ratifica. Pa nos di PDP e mision ta pa nos por haya representacion y haya bo confianza durante e eleccion pa bo vota, obviamente, y cu ora nos drenta Parlamento esaki sigur, ta un punto cu mi kier enfoca riba dje”, e lider politico a recalca.
Leonardo, como lider di PDP a expresa cu e politica pa su partido no ta uno pa critica, no ta un politica pa djis señala kico ta e problema y retonan. “Mi ta kere esey tur hende por haci, pero pa nos ta un politica riba proposicion y solucionnan, cu nos ta kere esencial, pa por logra yega na mas proteccion pa nos muchanan”, el a reitera.
