Parlamentario Hendrik Tevreden:
ORANJESTAD (AAN): Durante e reunion publico tocante e Fondo General di Inversion y Desaroyo (AIOF) den Parlamento, a mustra claramente cu e sosten politico dentro di e coalicion no ta algo cu Gobierno por considera automatico. Aunke e presupuesto a keda aproba cu 11 voto pro y 7 contra, e discusion aki a laga un pregunta fundamental riba mesa: cuanto confiansa tin realmente den e manera cu Gobierno ta maneha e recursonan publico y ta duna cuenta na Parlamento?
Sker visibel den coalicion
E señal mas cla di e falta di cohesion a bini di Parlamentario Mike de Meza (AVP), kende a vota na fabor di e mocion di MEP pa exigi claridad di Minister Gerlien Croes tocante su vuelo den avion priva den e proximo dos simannan. Despues, el a bandona sala y no a participa den e votacion final di e presupuesto. Esey no ta significa cu e coalicion a cay, pero sí cu e unidad politico a haya un sker mas profundo y visibel.
Falta di prioridad y control den AIOF
Pa Parlamentario Hendrik Tevreden, e punto di salida di e preocupacion rond di e Fondo General di Inversion y Desaroyo (AIOF) ta radica den e falta di prioridad y control efectivo. El a enfatisa cu Fraccion di MEP no ta contra inversion, sino cu nan ta exigi claridad riba tres aspecto fundamental: cua necesidad di pueblo ta haya prioridad prome, riba ki criterio e escogencianan aki ta wordo fundamenta, y con Parlamento por controla e resultadonan.
E preocupacion aki ta haya apoyo di Raad van Advies, kende a cuestiona e fundeshi legal, e control riba e transferencianan di placa, e clasificacion di e proyectonan y e falta di un plan di inversion integra. Di tur dos banda di sala, tabatin duda profundo riba e maneho aki.
Proyectonan scogi a base di willekeur
Tin cierto criterionan cu a wordo menciona, pero e pregunta ta: con a aplica esakinan na cada proyecto? Unda e secuencia y e plan concreto ta? Cua ta e evaluacion cu ta demostra dicon un proyecto specifico ta haya prioridad, y ki resultado e ciudadano por spera?
Di 8 proyecto riba lista, 7 no a pasa door di un comision pa wordo controla; nan a bini riba lista sin ningun criterio cla (willekeur). E falta di control aki lo trece problema pa e placa di e fondo, cu al final ta placa di pueblo.
E nota di cambio ta presenta Afl. 59,502 miyon den inversion, di cual Afl. 33,294 miyon ta wordo financia. Gobierno ta spera di ricibi recursonan adicional y haci e ehecucion den diferente fase. Precisamente pa e motibo ey, e escogencianan mester ta transparente, manera cu propio Algemene Rekenkamer Aruba (ARA) a conseha Parlamento.
Aruba no por bolbe den un mentalidad di: "tin placa, ban busca unda pa gast’e". Tampoco control di CAft por bira e unico motibo pa haci escogencianan responsabel. Nos propio Gobierno y Parlamento mester tin disciplina, prioridad y resultado.
Dunamento di cuenta, transparencia y e responsabilidad di Gobierno
E debate a pone un otro problema serio riba mesa: e falta di dunamento di cuenta di Minister Gerlien Croes. Via un mocion, fraccion di MEP a pidi pa e minister entrega informacion y prueba di pago di e vuelo priva den un plaso di dos siman. E mocion no a pasa. Sin embargo, e sosten di parlamentario De Meza a mustra cu e exigencia di transparencia no ta limita unicamente na oposicion.
E asunto aki awor tin un trayectoria hudicial habri pa determina ken a cubri e otro gastonan y si tabatin un regalo envolvi cu mester a wordo declara y aproba segun e reglanan di integridad. Politicamente, e situacion ta delicado: si e falta di transparencia aki persisti, con por sostene e confiansa den e minister ainda? un mocion di desconfiansa por bira e siguiente paso.
Prome Minister Mike Eman tambe tin e responsabilidad directo pa e manera cu su gabinete ta responde na Parlamento. E pueblo di Aruba merece informacion verificabel, decisionnan bon splica y lidernan politico cu ta duna cuenta.
E fondo a pasa. E preguntanan tocante control y confiansa a keda.
