Clifford Heyliger, fraccion AVP, tocante Parlatino:
ORANJESTAD (AAN)- Parlamentario Clifford Heyliger, di fraccion di AVP, cu a fungi como Coordinador di Parlatino, durante e reunion cu a tuma lugar na Aruba, e dianan 24 y 25 di September ultimo, a amplia informacion al respecto, den entrevista cu DIARIO.
“Tabata tin dos Comision: Comision di Medio Ambiente y Turismo, y Comision di Agricultura, Cria y Pesca. Ambos Comision a bay na mesun bishita na WEB Aruba NV y AWSS.
E Comision di Medio Ambiente, tabata mas interesa den con nos ta produci efecto riba medio ambiente, y tambe nan a keda basta impresiona cu e prijs di awa y esun di Agricultura tambe.
Comparando cu nan pais, pa chikito cu nos ta, nan ta haya cu nos ta hopi eficiente, y tambe cu e prijs cu nos ta produci ta basta abao”, segun Parlamentario Heyliger.
Aunke el a expresa cu tur cos ta relativo, prijs ta basta abao, pasobra si compara Aruba cu paisnan den Caribe y Latinoamerica, unda bo ta kere cu e costo di awa ta mas abao, no t’asina. Na Aruba touch nan ta impresiona cu nos por genera un calidad di awa asina, pa e prijs cu nos produci’e.
E tour aki na WEB y AWSS tabata hopi bon. “Un elogio pa WEB y AWSS. AWSS a splica con nan ta haci for di momento cu e grupo nobo a subi, mas of menos un aña y pico atras te cu awo, y kico ta e retonan cu nan tin pa bay dilanti, y tambe e parti di cunukero.
E grupo di agricultura tabata akinan, y nan pregunta tabata ‘ki tipo di awa ta uza pa agricultura?’ -nos ta uza awa di bebe- ‘Ki plannan tin p’haci algo cu ne?’ -Bo sa, produci awa por ta hasta mas economico di locual tin, pasobra pa un agricultor chikito, e prijs di awa cu WEB ta dun’e aunke e ta reduci, touch ta pisa hopi-. Pasobra nos ta hopi seco, hopi calor, nan ta uza hopi awa pa crece nan berduranan. Anto, touch nos tin cu busca un otro solucion of miho solucion p’esey. Esaki ta un di e temanan cu a wordo discuti”, e parlamentario a señala.
Heyliger a agrega cu nan tabata tin hopi pregunta tocante con Aruba ta haci, con ta logr’e; e structura cu Aruba tin tambe di gobierno, Utilities, anto e companianan bao di esey, tambe ta algo cu tin nan hopi interesa, pa tene politiek afo, pa e companianan por maneha nan mes comercialmente, anto ta mas efectivo. “Esey ta algo cu nan a wak. Bo ta ripara cu nos hendenan sa con pa maneha proyectonan, nan sa con pa planea pa futuro, anto esey ta cosnan cu nos tin hopi mas conocemento cu nos por traha hunto y yuda otro paisnan, nos por haci algo cu ne”, e Parlamentario a acentua.
