Parlamentario y Lider fraccion MEP, Evelyn Wever-Croes:
ORANJESTAD (AAN) Parlamentario Evelyn Wever-Croes, lider di Partido Movimento Electoral di Pueblo (MEP), a keda satisfecho cu e anochi informativo organiza pa PPA, tocante e tema di HOFA.
“Mi a haye hopi exitoso y mi ta gradici PPA pa e invitacion y pa nos por tabata presente duna informacion. E tabata bon modera, e presencia tambe di gremio comercial y comerciantenan individual, y sindicatonan tabata hopi bon; nan contribucion y input tambe mi a haya hopi importante.
Pa nos, como Parlamentario, informacionnan asina ta forma bo, den e debate cu bo tin cu hiba. E debate, na fin di dia, bo tin cu hibe den nomber di pueblo di Aruba, pues e encuentro aki mi ta considere tambe, pa e motibo ey, hopi exitoso, pasobra bo ta sinti kico ta biba den comunidad, y nos ta sinti cu nos a purba duna mas informacion. Na fin di dia un pueblo informa, ta un pueblo cu por tuma un bon decision y un pueblo cu no ta informa, no por tuma un bon decision. Mi ta spera cu e informacion por yuda pa tur hende fiha un posicion den esaki”, Parlamentario Evelyn Wever-Croes a señala.
