Presidente di Parlamento Marlon Sneek:
ORANJESTAD (AAN): Presidente di Parlamento Marlon Sneek elabora den corto riba algun tema cu lo tin riba agenda durante e reunion di IPKO cu awe, diahuebs ta tuma luga na Aruba entre Parlamentonan di Reino. Principalmente, el a pone enfasis riba e trato diferente cu paisnan di Reino a haya riba prestamo pa e mesun problema, esta Covid.
E tema di e situacion na Venezuela ta keda uno di relevancia pa nos pais na unda cu a base di informacionnan pertinente, por tuma desicionnan como pais riba e siguridad di e region y si Aruba ta cla pa habri frontera.
Riba e tema economico, lo papia di e tipo di negoshinan cu por bin na Aruba y cua companianan tin interes pa inverti na Aruba entre otro den almacenahe pero tambe pa start un refineria nobo.
E tema di enseñansa, specialmente riba e tema di hobennan cu ta studia den exterior y con pa atende cu nan despues cu nan bolbe di nan estudio y ta haya nan den debe. E problematica di vivienda pa studiantenan na Hulanda tambe lo haya atencion.
Presidente di Parlamento a enfatisa cu e tema di deficit den Reino tambe lo ser trata. Specialmente riba con pa haci cambionan pa garantisa cu cada partner den Reino ta sinti su mes di berdad na cas.
El a remarca cu tempo cu Aruba a tuma e debe di Covid, tawatin cuatro pais den Reino. Hulanda, Corsou, Sint Maarten y Aruba. Hulanda a haya dispensacion pa e prestamo cu nan a haci. Sint Maarten a haya na 0%. Corsou a haya na 3.1% y Aruba a haya na 6.9%. Esakinan, segun e, ta e tipo di discusionnan cu ta tumando luga pa algun tempo caba den diferente reunion di Reino, entre otro IPKO y Tripartiet.
“Con ta posibel cu pa e mesun prestamo pa e mesun problema, toch bo ta wordo trata diferente. Esaki ta e deficit democratico cu tin cu ta wordo discuti den varios reunion y lo atende cu esaki y pa once and for all kita tur e discrepancianan aki”, Presidente di Parlamento Marlon Sneek a expresa.
IPKO ta tumando luga na Aruba entre delegacionnan di tur pais den Reino, cuminsando awe 19 di februari y lo termina diasabra 21 di februari, cu firmamento di e lista di acuerdonan y un conferencia di prensa.
