Red Democratico/Rudy Lampe
ORANJESTAD (AAN): Segun Rudy Lampe di Red Democratico, na september 2021 como Minister di Desaroyo Sostenibel mi a hasi entrega di e overdrachtsdocument na Minister Geoffrey Wever. Eynan mi a argumenta cu mi a no haya ningun departamento di gobierno, ni personal ni presupuesto pa Ministerio di Desaroyo Sostenibel. Asina mes nos a produsi un Vision Economia Circular 2050 cu a keda presenta y discuti na Circular Economy International Conference for the Americas na november 2020.
RED a duna beneficio di duda na Minister Geoffrey Wever cu siendo Ministro di Economia e tin mas tools pa concretiza e vision aki di economia circular. Despues di un aña nos beneficio di duda a termina den un decepcion. Minister Wever no tin ningun plan concreto pa realisa esaki, e ta keda na nivel di comision, MOU, hasi estudio, mientras cu tin un vision kant en klaar pa ehecuta. Ma keda busca unda mi por haya un timetable di ehecucion di un action plan, y nergens te vinden.
Nos economia ta keda draai riba un pilar economico so, esta turismo, cu no ta sostenibel. Y no tin ningun indicio concreto cu lo crea otro pilar economico, zero. Na november 2018 caba mi a organisa como minister di desaroyo sostenibel un encuentro internacional na Aruba cu representantenan di diferente gobierno di nos region y unda nos a elabora riba e industria di cannabis medicinal como un pilar economico nobo y e industria di hemp como ehempel di economía circular. Den nos region tur pais representa na e conferencia aki a bai laga Aruba atras riba e topico aki. Hasta St. Maarten a dal e stap den direccion di cannabis recreacional. St. Vincent a cominza exporta cannabis medicinal.
Den e overdracht di ex minister di economía, Xiomara Maduro, pa minister Wever, seguramente a entregue e siguiente rapport traha pa un experto di Hulanda: Productie van Medicinaal Cannabis Aruba, Financiele Impact op de Begroting, di 5 di december 2019. E rapport ta bisa cu e ta asina prometedor pa Aruba e pilar economico nobo aki, cu e ta recomenda cu mester bai over na accion rapido.
Pues minister Wever tampoco tin e voluntad pa diversifica nos economia creando e pilar nobo aki. Y pa bo por wanta sla pa e pueblo den e temponan aki bo mester di otro pilar economico. E fracaso economico ke men cu prijs di gas tin cu subi drasticamente, di cuminda, di gasolin, di awa y coriente, pasobra no a crea un buffer cu ta duna e posibilidad na e gobierno pa duna un man na e consumidor.
