Booshi Wever di UPP:
ORANJESTAD (AAN): Segun drs. Booshi Wever kende ta miembro di Partido UPP, dos siman pasa cu masha fanfaria por a mira con minister Ursell Arends orguyosamente a anuncia cu el a firma un contracto cu 2 compania local pa procesa tirenan.
Segun Wever, ta duel’e atrobe pa constata cu un poco modificacion lo por a usa e "shredder" di e mashin di Bouldin & Lawson. Loke cu a strañ’e inmensamente ta e hecho cu ningun partido politico, atrobe cu excepcion di UPP, a bisa algo al respecto.
Pa cuminza, Gobierno no a duna ningun detaye di e "deal" aki. Unda e transparencia a keda? Of eta mescos cu e deal di LNG? Cuanto lo bay paga e companianan pa e trabao? Por nada sigur nan lo no hacie!
Atrobe Serlimar lo bay paga mas cu “double", mescos cu loke a sosode tempo di e contrato di e "bayling"? Serlimar e tempo ey a propone pa paga 85 Florin pa ton, pero pa complace a bay di acuerdo y a firma pa Serlimar paga awg. 180 pa ton. Atrobe e unico partido cu a haci denuncia ta UPP. Tur otro partido politico a keda "muisstil"! Di con?
Den pasado hopi ta esnan cu a bin cu proposicion pa un solucion pa procesamento di e tirenan. Pero tur kier un "deal".
Segun Wever, den otro palabra, ta Serlimar (pueblo) lo mester bay paga pa esaki y den e caso aki lo no ta diferente. E Trash to Cash lo no ta na ventaha di Serlimar. Pero e pregunta ta, cuanto e "deal" aki lo bay costa nos pueblo? Lo ta un suma exageradamente halto, pa no 1 compania gana placa pero 2 compania gana placa?
A core firma un contracto lubidando di traha un MB pa regla cu no mag di tira tire na Parkietenbos mas. Awor den pura ta core traha uno! Di con tanto pura asina? Kico ta e ansha den esaki?
E miembro di UPP a bisa cu den e ley di 2005, ta poní hopi cla cu e tareanan di Serlimar ta "recohe y "procesa" tur desperdicio di Aruba. Tur esaki cu e pensamento cu lo cumpli cu e tareanan aki sin e miras pa haci ganashi. E pensamento e tempo ey tabata cu e "recohemento y "procesamento" di desperdicio ta un tarea di gobierno.
Awor ta core firma (fix) un contrato sin cambio di ley, djis pa complace cu companianan amigo y pa colmo sin ningun tipo di destaho publico! No mester lubida cu esun cu sali di malo ora cu no tin destaho ta e pueblo. Wever ta puntra su mes si esaki ta ‘integro’.
“Un biaha mas nos ta constata cu ta hiba un maneho dirigi explicitamente pa caba cu Serlimar. Den pasado nos a mira esaki caba. Na 2001 e maneho pa caba cu Serlimar a cambia y a dirigi e maneho pa Salba Serlimar. Na fin di 2009 por a ser constata cu e maneho pa “Caba cu Serlimar” a bolbe lanta cabez bao gobierno di AVP y cu e cambio di gobierno na 2017 e maneho diabolico aki a continua y te hasta esaki a worde intensiva,” Wever a bisa.
Awor parce cu e trabao ta pa caba definitivamente cu Serlimar. Ya caba nos por a mira cu na fin di 2009 AVP y Benny Sevinger a "boycot" (Bouldin & Lawson) e solucion duradero, structural y pagabel cu e meta final pa ‘Caba cu Serlimar’. Pa pone un fin na speranza pa salba Serlimar, partido POR y Otmar Oduber a desmantela e planta di B&L.
Pa sigui cu e desangramento di Serlimar a firma e contrato miyonario pa completa e plan diabolico, esta caba definitivamente cu Serlimar. E tempo di MEP di Betico Croes, a premira caba Serlimar como un servicio di utilidad publico. Un pensamento social-democrata cu Serlimar ta un compania di utilidad y mester cumpli cu su tareanan y NO por bay den mannan priva. Recientemente e gobierno actual pa medio di minister Ursell Arends, a anuncia cu e parti na unda Serlimar por produci entrada lo ser privatisa.
Ta hustamente den parti di "procesamento" Serlimar tin un saldo positivo te cu 2017 di casi 3 miyon pa aña. Ta pesey hopi ta tras di e "verwerking". Pues enbez cu Serlimar ta haya entrada, cu por cierto por Salba Serlimar otro ta haye di regaldo. Cu otro palabra Serlimar lo desaparece. Un biaha mas ningun partido politico a bisa algo cu excepcion di UPP.
Ta conoci cu e maneho actual di tanto gobierno y gerencia di Serlimar ta pa caba cu e compania estatal aki. Enbez di mantene unda por genera entrada ("procesamento") ta deshaci di esaki y pa colmo bay paga pa esaki. Y pa colmo e parti cu NO ta yega na e "break- even-point" (recohemento) si ta keda manteni.
Kico lo ta e resultado? Serlimar lo caba na filingrana! Ni cuanto palabra bunita ser bisá. Ya caba CAft a duna su sentencia, esta: "geen rooie cent" mas pa subsidia perdida na Serlimar. Mientras UPP a adverti pa esaki, hopi a burla, pero awe e realidad amargo a dal nos den cara.
