Parlamentario Marco Berlis:
*AZV lo cubri esakinan bek
*Tambe lo baha of elimina lista di spera pa cita medico
ORANJESTAD (AAN) – Salud ta otro di e puntonan di prioridad di Partido Movimento Electoral di Pueblo, durante un siguiente gobernacion. Parlamentario Marco Berlis a elabora riba esaki, den conferencia di prensa di fraccion di MEP. Aki a toca specificamente, e tema di salud.
“Mi ta kere Salud ta otro di e puntonan importante di prioridad, pasobra tin diferente preocupacion cu ta reina bao di pueblo riba e tema aki”, e parlamentario a señala, y a referi na locual e proximo gobernacion lo trece riba e punto di prioridad aki, awo cu tin mas espacio financiero, segun Berlis.
E parlamentario a menciona cu lo elimina e lista di spera y lo trata cu e listanan aki di specialista. Berlis a indica cu esaki ta hopi necesario, mirando cu tin cierto areanan di specialismo unda cu mester warda varios luna pa haya un cita.
“Lo traha duro pa tin mas specialista, pa baha e lista di spera y mi ta kere esaki lo trece un alivio pa e ciudadanonan, sigur ora wak cierto malesanan of tin cierto condicionnan di salud hopi malo, cu warda tanto tempo riba lista ta algo hopi preocupante. Esaki ta algo cu sigur ta hopi bon bini; tambe Stichting Hunto cu mas psicologo, pa cu salud mental”, Berlis a trece dilanti.
El agrega cu esaki ta hopi bon mirando cu tin un scarcedad riba e tereno aki. Tambe lo enfoca riba remedinan pa pensionado cu lo wordo cubri bek door di AZV. Esaki tambe ta otro punto di preocupacion, pero mirando cu tin espacio financiero aworaki, e presupuestonan, structuralmente, ta mustra surplus cu tin mas placa den caha di gobierno. “Y manera mi a bisa caba, desde 2023 ta aumentando pensioen di behez, yudando e pensionado, hasta a aumenta e reparative toeslag cu 100 florin pa pensionado den siete aña; tambe a baha un total di 5.5% di e premie di AZV pa pensionado, y aworaki lo bay kita tambe locual ta remedinan cu mester a paga antes. Pa pensionadonan lo wordo cubri atrobe pa AZV”, Berlis a menciona.
E Parlamentario a bisa cu tin cinco punto mas cu e lo sigui elabora den un siguiente occasion, p’asina pueblo ta bon informa tocante kico gobieno ta bay haci di 2024 -2025, te 2029.
