Parlamentario Rocco Tjon:
*A laga full un plan atras y e recursonan pa wordo ehecuta
ORANJESTAD (AAN) Den su declaracion, den entrevista cu Matutino DIARIO, Parlamentario Rocco Tjon a bisa cu pa loke ta Brandweer, el a duna Minister Dowers, den e ‘overdrachtsnota’, despues cu gobierno anterior a inverti den personal, unda diferente opleiding a tuma lugar, y klasnan nobo.
Ademas nan a reanuda, loke tabata un iniciativa di ex-minister Bikker, unda tur e bomberonan a bay Merca pa sigui trainingnan y a cumpra varios truck nobo cu a laga atras tambe pa señor Dowers, ken den tur transparencia a firma e contract aki, ademas di e compra di tres crash tenders nobo. Tempo cu e tabata na mando di husticia tambe el a bin busca e sentimentonan di Parlamento, y a inverti den tur material.
“P’esey mi no por compronde tambe, cierto expresionnan di e personal di Brandweer, pa mi ta full honesto aworaki, cu “nan falta material”. Nos a percura, den bon cooperacion di sindicato di Brandweer e tempo ey, señor Rosa y despues señor Ramada, pa nan haya tur e material cu nan tin mester, entre otro, uniform, handschoen, etc, cu e personal mester”, Parlamentario Tjon a señala.
A renoba e brandweer post di San Nicolas, y laga full un plan atras pa minister Dowers, y obviamente e recursonan financiero tambe e plan aki por wordo ehecuta.
“Mi ta spera cu esaki tampoco lo bira un proyecto cu nan ta bay stop aworaki. Pero tambe mi a laga atras pa señor Dowers un map cu tur informacion y tur e pasonan cu mester tuma. Pasobra mi a scuch’e bisa cu Brandweer su postnan ta cumpli minimal cu tur e rekisitonan. Mi por bisa cu nos a hereda un brandweer post, e tempo ey ta for di su persona tambe, esey si den decadencia. Mi ta corda, y mi ta sigur cu pueblo a wak tur e videonan aki, unda cu e trucknan di brandweer mester a start cu un bleki di pif paf. Esaki bao di temporada di señor Dowers, anto pa e bin bisa aworaki cu nos no a haci nada. Mi ta kere cu e aumento cu a caba di mustra riba e presupuestonan di husticia netamente pa nos cumpra e tur e trucknan pa nos haci renobacionnan di e diferente postnan, nos por a cumpra tur e material pa e personal, cu e bomberonan tin mester pa nan por ehecuta nan trabao na un manera safe, y aworaki nos a laga un presupuesto/surplus atras di 500 miyon florin, danki na e bon maneho financiero di señora Xiomara Maduro, anto esaki netamente pa nos por a aumenta tur e presupuestonan di husticia tambe pa nos por ehecuta tur e proyectonan cu nos a bin ta laga atras”, Parlamentario Tjon a remarca.
